Friday, October 14, 2016

ബിസിനസും പ്രായവും തമ്മില്‍ ബന്ധമുണ്ടോ?

ബിസിനസും പ്രായവും തമ്മില്‍ ബന്ധമുണ്ടോ? ഉണ്ടെന്ന് പറയേണ്ടിവരും. ഇന്ന് വിജയം നേടിയിട്ടുള്ള പഴയ ബിസിനസുകാരുടെ ചരിത്രം പരിശോധിച്ചാല്‍ മാത്രം മതി അത് മനസിലാകാന്‍! അവരില്‍ മിക്കവരും പാതി വഴിയില്‍ പഠനം ഉപേക്ഷിച്ച് കൗമാര കാലത്തു തന്നെ ബിസിനസിലേക്ക് ഇറങ്ങിയവരാണ്. പക്ഷേ, ഇടക്കാലത്ത് വെച്ച് നമുക്ക് ആ ശീലം (ഇടയില്‍ വെച്ച് പഠനം നിറുത്തുന്ന ശീലം!) നഷ്ടപ്പെട്ടുപോയി. കാരണം ഇങ്ങനെ ബിസിനസുകാരായി കാശുണ്ടാക്കിയവരില്‍ പലരും തങ്ങളുടെ മക്കള്‍, തങ്ങള്‍ നേടാത്ത വിദ്യാഭ്യാസം നേടണം എന്ന് ആഗ്രഹിച്ചു. അങ്ങനെ യുഎസിലും യുകെയിലും ഉന്നത വിദ്യാഭ്യാസത്തിനായി ആ തലമുറ പറന്നു. അവരൊക്കെ ഇപ്പോള്‍ തിരിച്ചുവന്ന് ബിസിനസ് ഏറ്റെടുക്കാനുള്ള ശ്രമങ്ങള്‍ പലയിടത്തും നടന്നുകൊണ്ടിരിക്കുന്നു.
എന്റെ ഒരു പരിചയക്കാരനുണ്ട്! കേരളത്തില്‍ തന്നെ അറിയപ്പെടുന്ന സാനിറ്ററിവെയര്‍ ഔട്ട്‌ലെറ്റിന്റെ ഉടമയാണ് കക്ഷി. തല്‍ക്കാലം നമുക്ക് പുള്ളിയെ ജോസഫ് എന്നു വിളിക്കാം! പത്താം ക്ലാസ് കഴിഞ്ഞപ്പോള്‍ പിതാവിന്റെ ഹാര്‍ഡ്‌വെയര്‍ ബിസിനസിനെ സഹായിക്കാന്‍ ഇറങ്ങിയതാണ്. പിന്നെ ഇതുവരെ തിരിച്ചു കയറിയിട്ടില്ല. രണ്ട് ആണ്മക്കള്‍….ജോഫിനും ജോനാതനും. ചെറിയ രീതിയില്‍ തുടങ്ങിയ ബിസിനസ് മറ്റു വലിയ എതിരാളികള്‍ ഇല്ലാതിരുന്നതിനാലും ജോസഫേട്ടന്റെ ചില തരികിട നമ്പരുകള്‍ കൊണ്ടും ലാഭത്തിലായി…നാട്ടിലെ പ്രമാണികളില്‍ ജോസഫേട്ടന്‍ മുന്‍നിരയിലെത്തി…പിള്ളാരെ ഈ ‘കക്കൂസ് വില്‍ക്കുന്ന'(അദ്ദേഹത്തിന്റെ ഭാഷയാണ്!) പരിപാടിയില്‍ അദ്ദേഹം തൊടീച്ചില്ല. ജില്ലയിലെ മുന്തിയ സ്‌കൂളില്‍ തന്നെ പഠിപ്പിച്ചു. പറക്കമുറ്റാറായപ്പോള്‍ രണ്ടിനെയും യുകെയിലേക്കും യുഎസിലേക്കും പറപ്പിച്ചു!! ജോസഫേട്ടന്‍ പഴയ സ്‌റ്റൈലില്‍ തന്നെ കച്ചോടം തുടര്‍ന്നു.
ലോറിക്കാരോട് വഴക്കടിച്ചും കമ്പനിക്കാരോട് ഗുസ്തി പിടിച്ചും ജോസഫേട്ടന്‍ കത്തിക്കയറി. ബ്രാഞ്ചുകള്‍ ആറെണ്ണം ജില്ലയുടെ പല ഭാഗങ്ങളില്‍ ഉയര്‍ന്നു. അങ്ങനെയിരിക്കുമ്പോള്‍ അതാ വരുന്നു ജോഫിന്‍…,യുകെയില്‍ നിന്ന്! പിന്നാലെ തന്നെ ജോനാതനും! യുകെയില്‍ കാറ് കഴുകുന്ന ജോലി മാത്രമേ കിട്ടുള്ളൂ എന്ന് മനസിലാക്കിയ ജോഫിന്‍, നാട്ടിലെ ബിസിനസ് താന്‍ പഠിച്ച ബിസിനസ് മാനെജ്‌മെന്റ്‌വെച്ച് പ്രൊഫഷണല്‍ ആക്കിക്കളയാമെന്ന് തീരുമാനിച്ചാണ് വരവ്! ജോഫിന്‍ വരുന്നു എന്നറിഞ്ഞ്, അവസരം കളയണ്ട എന്ന് കരുതിയാണ് യുഎസില്‍ ഹോട്ടല്‍ മാനെജ്‌മെന്റ് പഠിച്ച ജോനാതന്‍ ഇറങ്ങിപ്പുറപ്പെട്ടത്! സംഭവം എന്തായാലും രണ്ടു പേരും നാട്ടിലെത്തി. ജോസഫേട്ടന്റെ അടുത്ത് കാര്യം അവതരിപ്പിച്ചു. മക്കള്‍ അടുത്തെത്തിയ ആനന്ദനിര്‍വൃതിയിലായിരുന്നു ജോസഫേട്ടന്‍! ഉന്നത വിദ്യാഭ്യാസം നേടിയ മക്കള്‍ക്ക് തന്നെക്കാള്‍ നന്നായി ബിസിനസ് നോക്കിനടത്താന്‍ കഴിയുമെന്നും പുള്ളി ഉറപ്പിച്ചു. ജോഫിന് പര്‍ച്ചെയ്‌സിന്റെ ചുമതലയും ജോനാതന് സെയില്‍സിന്റെ ചുമതലയും നല്‍കി, ജോസഫേട്ടന്‍ കളി കാണാന്‍ ഗാലറിയില്‍ ഇരുന്നു…സോറി..ഗാലറിയില്‍ നിന്ന് എഴുന്നേറ്റ് ഒരു മാസത്തെ സുഖ ചികിത്സയ്ക്ക് പോയി.
ആദ്യം പൊട്ടിത്തുടങ്ങിയത് ബിസിനസ് മാനെജ്‌മെന്റ് വിദഗ്ധന്‍ ജോഫിന്‍ കൈകാര്യം ചെയ്ത പര്‍ച്ചെയ്‌സിംഗ് തന്നെയായിരുന്നു. ആടിക്കറക്കാനും പാടിക്കറക്കാനും അറിയാമായിരുന്ന ജോസഫേട്ടന്റെ മക്കള്‍ കമ്പനികളെയും അവരുടെ സ്റ്റാഫിനെയും അഭിമുഖീകരിച്ചപ്പോള്‍ മുട്ടിടിച്ചു. ജോസഫേട്ടന് ക്രെഡിറ്റ് കൊടുത്തിരുന്ന പലരും ജോഫിന് അത് നല്‍കാന്‍ തയാറായില്ല. പലതും റെഡി കാഷില്‍ മേടിക്കേണ്ടിവന്നു. കാലങ്ങളുടെ ബിസിനസ് പരിചയമുള്ള ജോസഫേട്ടന് എന്ത് എപ്പോള്‍ വാങ്ങണമെന്ന് മനപാഠമായിരുന്നു. ഇതറിയാത്ത ജോഫിന്‍, മറ്റുള്ളവരുടെ വാക്കുകള്‍ അതേപടി വിഴുങ്ങി. ചുരുക്കിപ്പറഞ്ഞാല്‍ റെഡി കാഷിന് കോടികളുടെ ഡെഡ് സ്‌റ്റോക്ക് ഉണ്ടാക്കുകയായിരുന്നു ജോഫിന്‍. ഇത് സെയില്‍സിനെയും ബാധിക്കാന്‍ തുടങ്ങി. കസ്റ്റമേഴ്‌സുമായി ഇതുവരെ ഇടപഴകിയിട്ടില്ലാത്ത ജോനാതന്‍ പലരെയും വെറുപ്പിക്കാന്‍ കൂടി തുടങ്ങിയതോടെ വെറും ഒറ്റ മാസം കൊണ്ട് ബിസിനസ് സാമ്രാജ്യത്തിന് വിള്ളല്‍വീണു തുടങ്ങി. സുഖ ചികിത്സ കഴിഞ്ഞുവന്ന ജോസഫേട്ടന്‍ ടാലി തുറന്നു നോക്കി. അന്നായിരുന്നു അദ്ദേഹം മക്കളുടെ വിദ്യാഭ്യാസത്തിന്റെ ‘പൊരുള്‍’ ആദ്യമായി മനസിലാക്കിയത്.
അന്നു രാത്രി, കക്ഷി രണ്ടു മക്കളെയും അടുത്തു വിളിച്ചു. രണ്ടു പേരെയും വെയര്‍ഹൗസില്‍ സൂപ്പര്‍വൈസര്‍മാരാക്കി…അടുത്ത രണ്ടു വര്‍ഷത്തേയ്ക്ക് തങ്ങളുടെ ജോലി ഇതാണെന്ന് മനസിലാക്കിയ മക്കള്‍ ആദ്യം തളര്‍ന്നു. പിന്നെ, തങ്ങളെ കാത്തിരിക്കുന്ന കോടികളുടെ സൗഭാഗ്യത്തെ കുറിച്ച് ആലോചിച്ചപ്പോള്‍ പണിയെടുക്കാന്‍ തന്നെ തീരുമാനിച്ചു. ഇപ്പോള്‍ രണ്ടു പേരും ഹാപ്പിയാണ്. അവരുടെ സമ്പാദ്യത്തിന് വിയര്‍പ്പിന്റെ മണമുണ്ട്. ജോസഫേട്ടന്റെ ബിസിനസിന് ഉയര്‍ച്ചയും!
ഇത് ഒരു ഒറ്റപ്പെട്ട കഥയല്ല. കേരളത്തില്‍ പലയിടത്തും നടക്കുന്ന സംഭവം തന്നെയാണ്. രണ്ട് പ്രധാന കാര്യങ്ങളാണ് ഈ സംഭവകഥ നമ്മെ മനസിലാക്കിത്തരുന്നത് എന്നു തോന്നുന്നു. ഒന്ന്- ബിസിനസിനെ പ്രൊഫഷനല്‍ ആക്കേണ്ടതിന്റെ പ്രാധാന്യത്തെ കുറിച്ചാണ്. മറ്റൊന്ന് ബിസിനസിലേക്ക് ഇറങ്ങേണ്ട പ്രായത്തെ കുറിച്ചും. പ്രായത്തെ കുറിച്ച് നമുക്ക് കുറച്ചു കൂടി ആഴത്തില്‍ ചിന്തിച്ചു നോക്കാം!
നേരത്തെ പറഞ്ഞ തലമുറയില്‍ (ഇപ്പോള്‍ ഒരു മുപ്പതു വയസൊക്കെ വരുന്ന തലമുറ) പെട്ടവരില്‍ പലരും നിര്‍ബന്ധിത വിദ്യാഭ്യാസത്തിന്റെ അടിമകളാണ്. മാതാപിതാക്കള്‍ക്ക് നേടാന്‍ കഴിയാതെ പോയത് മക്കള്‍ക്കു നേടിക്കൊടുക്കണം എന്ന നിര്‍ബന്ധബുദ്ധിയാണ് ഇതിന് പിന്നില്‍. പലരും ബ്രിട്ടനിലും യുഎസിലും പോയി എന്താണ് ചെയ്യുന്നതെന്ന് പോലും ആരും അറിയാറില്ല. മാത്രമല്ല യുകെയിലെയൊക്കെ ഏറ്റവും താഴ്ന്ന നിലവാരമുള്ള സ്ഥാപനങ്ങളിലാണ് പലരും ചെന്നു ചാടുന്നത്. അതിനാല്‍ തന്നെ വിദ്യാഭ്യാസപരമായി ഇവര്‍ ഒന്നും തന്നെ നേടുന്നില്ല. വ്യക്തമായ മാനെജ്‌മെന്റ് രീതികളും ഇവര്‍ക്ക് അന്യമാകുന്നു.ഭാവി ബിസിനസ് മക്കളുടെ കയ്യില്‍ ഭദ്രമാണെന്ന് കരുതുന്ന പാവം മാതാപിതാക്കന്മാര്‍ പലരും സത്യാവസ്ഥ മനസിലാക്കുന്നത്, ജോസഫേട്ടന്റെ അനുഭവം വരുമ്പോള്‍ മാത്രമാണ്.
ബിസിനസിന്റെ പള്‍സ് മനസിലാക്കാന്‍ ഒരു പ്ലസ് ടു കഴിയുമ്പോഴെങ്കിലും അതുമായി ബന്ധപ്പെട്ടു തുടങ്ങണം. ഫാമിലി ബിസിനസ് ആണെങ്കില്‍ പാര്‍ട്ട് ടൈം ആയി മക്കളെ ചില ഭാഗങ്ങളിലെങ്കിലും ഉള്‍ക്കൊള്ളിക്കാന്‍ മാതാപിതാക്കള്‍ ബോധപൂര്‍വമായ ശ്രമങ്ങള്‍ നടത്തണം. പത്ത് എംബിഎയ്ക്ക് തുല്യമാണ് ബിസിനസിലുള്ള ഒരു വര്‍ഷത്തെ പ്രായോഗിക പരിചയം എന്നതാണ് സത്യം.
വിദ്യാഭ്യാസ സ്ഥാപനങ്ങളില്‍ ബിസിനസ് ഒരു പഠന വിഷയമാക്കണം. സ്‌കൂളുകളില്‍ നിന്നു തന്നെ ബിസിനസ് എന്താണെന്നും, എങ്ങനെയാണെന്നും മനസിലാക്കാനുള്ള അവസരം കുട്ടികള്‍ക്ക് കൊടുത്താല്‍, ഒരുപക്ഷേ രാജ്യത്തിന്റെ സമ്പദ്ഘടനയില്‍ പോലും വലിയ മാറ്റങ്ങളുണ്ടാക്കാന്‍ കഴിഞ്ഞേക്കും. അനാവശ്യമായ പല വിഷയങ്ങളും കൊച്ചു പ്രായത്തില്‍ തലയില്‍ കയറ്റിവെയ്ക്കുന്നതിനു പകരം ബിസിനസിന്റെ അടിസ്ഥാന തത്വങ്ങള്‍ പഠിപ്പിച്ചാല്‍ മതി. ഇതിനു പകരം ഇരുപത്തിയഞ്ച് വയസ് കഴിയുമ്പോഴാണ് നമ്മുടെ നാട്ടില്‍ പലരും ബിസിനസ് എന്ന് കേട്ടു തുടങ്ങുന്നത് തന്നെ. എത്രയും നേരത്തെ ബിസിനസിനെ കുറിച്ചും അതിന്റെ രീതികളെ കുറിച്ചും അറിവ് നേടാന്‍ സാധിക്കുമോ, അത്രയും നല്ലത്. മാത്രമല്ല ഇളംപ്രായത്തില്‍ ബിസിനസിന്റെ ഏറ്റവും പ്രധാന ഘടകമായ ‘റിസ്‌ക് എടുക്കല്‍’ സാധ്യമാണ് താനും! വൈകിയെത്തുന്ന പലര്‍ക്കും റിസ്‌ക് എടുക്കാന്‍ കഴിയാത്തതു മൂലം നഷ്ടപ്പെടുന്ന അവസരങ്ങള്‍ ഏറെയാണ്.
വിദ്യാഭ്യാസ സമ്പ്രദായത്തില്‍ ഉടനെ കാതലായ മാറ്റങ്ങള്‍ വരുമെന്ന പ്രതീക്ഷയൊന്നും വേണ്ട…! അതിന് വേണ്ടി കാത്തുനില്‍ക്കാതെ, വളര്‍ന്നുവരുന്ന കുട്ടികളെ ചെറിയ സമ്പാദ്യ ശീലത്തിലേക്കും കൊച്ചു ബിസിനസുകളിലേക്കും പതിയെ കൈ പിടിച്ചു നടത്താന്‍ നാം ഓരോരുത്തരും മുന്‍കൈ എടുക്കണം. കുറഞ്ഞ പക്ഷം, ബിസിനസ് ഒരു മോശം കാര്യമല്ല എന്നെങ്കിലും പറഞ്ഞു കൊടുക്കാനുള്ള ആര്‍ജ്ജവം കാണിക്കണം. എങ്കില്‍ മാത്രമേ നമുക്കും നമ്മുടെ നാടിനും ഭാവിയില്‍ സ്വന്തം കാലില്‍ നില്‍ക്കാനാകൂ…

Tuesday, July 19, 2016

ബിസിനസും മതവിശ്വാസവും തമ്മില്‍ ബന്ധമുണ്ടോ?


കേരളത്തില്‍ ബിസിനസ് ചെയ്യുന്നവരെല്ലാം മനസിനകത്ത് ഒരിക്കലെങ്കിലും ചോദിച്ച ചോദ്യമായിരിക്കും ഇത്. ബിസിനസും മതവിശ്വാസവും തമ്മില്‍ ബന്ധമുണ്ടോ? കഴിഞ്ഞ എട്ടു കൊല്ലത്തെ കേരളത്തിലെ കണ്‍സള്‍ട്ടിംഗ് ജീവിതത്തിനിടയില്‍ ഇവ തമ്മില്‍ ബന്ധമുള്ളതായി എനിക്ക് തോന്നിയിട്ടുണ്ട്
...........................................................................
ഈയാഴ്ചയിലും ചിലരെ കണ്ടുമുട്ടിയപ്പോള്‍ ഈ ചിന്ത വീണ്ടും പൊന്തിവന്നു. ഇതിന് ശാസ്ത്രീയമോ സാങ്കേതികമോ ആയ തെളിവുകള്‍ ഒന്നും തന്നെയില്ലെങ്കിലും ഞാന്‍ ഇടപെട്ടവരില്‍ നിന്നും സമൂഹത്തില്‍ നിന്നും കിട്ടിയിട്ടുള്ള വിവരങ്ങളുടെ അടിസ്ഥാനത്തില്‍ ചില സത്യങ്ങള്‍ പറയാതെ വയ്യ.
കേരളത്തില്‍ നിന്ന് വലിയ ബ്രാന്‍ഡുകള്‍ ഉണ്ടാകാത്തതിനു കാരണം നമ്മുടെ കാഴ്ചപ്പാടിന്റെ പ്രശ്‌നമാണെന്ന് ഞാന്‍ മുന്‍പൊരിക്കല്‍ എഴുതിയിരുന്നു. ഈ കാഴ്ചപ്പാട് തന്നെയാണ് ബിസിനസും മതവും തമ്മില്‍ ബന്ധം ഉണ്ടാകാന്‍ കാരണവും.
ആദ്യം, ഒരു നല്ല ബിസിനസുകാരനാകാനും ലോകം അറിയുന്ന ഒരു വലിയ ബിസിനസ് സാമ്രാജ്യം കെട്ടിപ്പടുക്കാനും എന്തെല്ലാം വേണമെന്ന് നോക്കാം! വലിയ കാഴ്ചപ്പാട്, തുറന്ന സമീപനം, കഠിനമായി അധ്വാനിക്കാനുള്ള മനോഭാവം, നേതൃ പാടവം, അറിവ് അങ്ങനെ പോകുന്നു ആ വലിയ ലിസ്റ്റ്...പട്ടിക പരിശോധിച്ചാല്‍ മനസിലാകുന്ന രസകരമായ ഒരു സംഗതിയുണ്ട്.
പത്താം ക്ലാസിലെ മാര്‍ക്കോ എന്‍ട്രന്‍സിലെ റാങ്കോ എന്തിന് വിദ്യാഭാസ നിലവാരം പോലുമോ ഈ പട്ടികയില്‍ കാണാന്‍ കഴിഞ്ഞില്ലെന്നു വരും. അല്ലെങ്കില്‍ ഒരുപക്ഷേ ഏറ്റവും അവസാനമായിരിക്കും ഇതെല്ലാം!
അപ്പോള്‍ ഒരാളെ വലിയ ബിസിനസ്മാന്‍ ആക്കുന്നത് അവന്റെ സര്‍ട്ടിഫിക്കറ്റുകളല്ല എന്നുറപ്പ്. പക്ഷേ നിങ്ങള്‍ ശ്രദ്ധിച്ചിട്ടില്ലേ...,ഒരു കുട്ടി വളര്‍ന്നു വലുതാകുന്ന ഘട്ടത്തില്‍ മാതാപിതാക്കള്‍ അവനോടു പറയുന്നത്...'മോനെ, പഠിച്ചില്ലെങ്കില്‍ നല്ല ജോലിയൊന്നും കിട്ടില്ല. എന്‍ജിനീയറോ ഡോക്ടറോ ഒന്നും ആവാന്‍ പറ്റില്ല. അതുകൊണ്ട് മോനിപ്പോ പഠിത്തത്തില്‍ ശ്രദ്ധിക്കൂ..ബാക്കിയൊക്കെ പിന്നെ..' ഇത് ദിവസത്തില്‍ നാലും അഞ്ചും തവണയാണ് പലരും കുഞ്ഞുങ്ങളോട് ഓതിക്കൊണ്ടിരിക്കുന്നത്.
ഒരു മനുഷ്യന്‍ അവന്റെ ആദ്യ എട്ടു വര്‍ഷങ്ങളിലാണ് 'വാല്യൂ സിസ്റ്റം' വികസിപ്പിച്ചെടുക്കുന്നത്. അത് അവന്റെ മാതാപിതാക്കളും അയല്‍പ്പക്കക്കാരും കൂട്ടുകാരുമൊക്കെ ചേര്‍ന്ന് രൂപപ്പെടുത്തുന്നതാണ്. ഒരു ജോലി നേടിയെടുക്കുന്നതാണ് എല്ലാം എന്ന കാഴ്ചപ്പാടിലേക്ക് അവന്റെ രീതികള്‍ മാറ്റിയെടുക്കുകയാണ് നമ്മള്‍ ചെയ്യുന്നത്.
അതിനൊപ്പം തന്നെ റിസ്‌ക്കുള്ള ഒരു കാര്യത്തിനും അവനെ പ്രോത്സാഹിപ്പിക്കുകയും ഇല്ല. മാത്രമല്ല പിറകോട്ടു വലിക്കുകയും ചെയ്യും. അതോടെ ജീവിതത്തില്‍ റിസ്‌ക് എടുക്കുന്നത് പോയിട്ട്, മുഖം ഉയര്‍ത്തി സംസാരിക്കാനുള്ള ശേഷി പോലും ഇല്ലാതാവുകയും ചെയ്യും. പിന്നെ പഠിത്തമെല്ലാം കഴിഞ്ഞ് ഇരുപത്തിയഞ്ച് വയസാകുമ്പോള്‍ ഒരല്‍പ്പം 'റിസ്‌ക്' എടുക്കാം എന്നുവെച്ചാല്‍ പറ്റേണ്ടേ? പണ്ട് എടുത്തിട്ടില്ലെങ്കില്‍ ഇപ്പോള്‍ എടുത്താല്‍ പൊങ്ങില്ല. അത്ര തന്നെ.
ഇപ്പോള്‍ നിങ്ങള്‍ ചിന്തിക്കുന്നുണ്ടാവും ഇതില്‍ എവിടെയാ മതം എന്ന്, ഉണ്ടല്ലോ!
കുഞ്ഞായിരിക്കുമ്പോള്‍ നമ്മെയെല്ലാം ഒരുപാട് സ്വാധീനിക്കുന്ന ഒന്നാണ് നമ്മുടെ ആരാധനാ രീതികള്‍. ഫാന്റസിയുടെയും റിയാലിറ്റിയുടെയും ചായക്കൂട്ടുകള്‍ കൊണ്ട് നിറംപിടിപ്പിച്ചതാണ് അവയെല്ലാം. ഒപ്പം കുഞ്ഞു മനസിന്റെ നിഷ്‌കളങ്കതയും അറിയാനുള്ള ആഗ്രഹവും എല്ലാം സ്വീകരിക്കുന്ന മനസും കൂടിയാകുമ്പോള്‍ ആരാധനാ രീതികള്‍ക്കും ആരാധനാലയങ്ങള്‍ക്കും വിശ്വാസങ്ങള്‍ക്കും അത് പകര്‍ന്നു നല്‍കുന്നവര്‍ക്കും പ്രാധാന്യമേറുന്നു.
കേരളത്തില്‍ ഭൂരിഭാഗം വരുന്ന ഹിന്ദുക്കള്‍ ചെയ്യുന്ന ബിസിനസിന്റെ അളവ് തുലോം തുച്ഛമാണെന്ന് നമുക്കറിയാം. ഹിന്ദു ബെല്‍റ്റുകള്‍ ഒന്നുംതന്നെ ബിസിനസ് കേന്ദ്രങ്ങളായി അറിയപ്പെടുന്നുമില്ല. ഹിന്ദു കുടുംബങ്ങളിലുള്ള ബിസിനസുകാര്‍ പോലും മക്കളെ ബിസിനസിലേക്ക് കൊണ്ടുവരാതെ, പഠിച്ചു 'കേമനാകാന്‍' ഉപദേശിക്കുന്നു. ഇനിയിപ്പോ ഉള്ള ബിസിനസുകാരോട് എങ്ങനെയുണ്ട് ബിസിനസ് എന്നു ചോദിച്ചാലോ, മിക്കവാറും എല്ലാവരും ഒരേ സ്വരത്തില്‍ പറയും...'ആ...തട്ടി മുട്ടി പോകുന്നു'....എന്തേ അങ്ങനെ?
ഹിന്ദുമത വിശ്വാസങ്ങള്‍ പലപ്പോഴും വളരെ സ്വതന്ത്രമാണ്. പ്രത്യേക ചട്ടക്കൂടുകളോ രീതികളോ പറയാനില്ല. ആരാധിക്കുന്ന ദൈവങ്ങളുടെ എണ്ണത്തില്‍ പോലും കൃത്യമായ കണക്കില്ല. അതിനാല്‍ത്തന്നെ വളര്‍ന്നുവരുന്ന ഒരു കുട്ടിക്ക് വ്യക്തമായ സങ്കല്‍പ്പമോ ദൈവ ഭയമോ ഒരുപക്ഷേ അതിലൂടെ വ്യക്തമായ ജീവിത ലക്ഷ്യമോ ലഭിക്കാതെ പോകുന്നുണ്ടാകാം. പരസ്പര വിശ്വാസം, സഹവര്‍ത്തിത്വം, സാഹോദര്യം, കരുണ, അനുകമ്പ എന്നീ ഗുണഗണങ്ങള്‍ ഒക്കെ മനസിലാക്കിയെടുക്കേണ്ട ഈ കാലഘട്ടത്തില്‍ ഹിന്ദു മത വിശ്വാസികള്‍ പലപ്പോഴും തെളിമയുള്ള മാര്‍ഗനിര്‍ദേശങ്ങള്‍ കിട്ടാതെ അലയുന്നുവെന്നതും സത്യമാണ്.
ഈ മൂല്യങ്ങള്‍ വളര്‍ന്നുവരുമ്പോള്‍ അതിന്റേതായ അളവില്‍ പലരിലും ഇല്ലാതാകാനുള്ള കാരണവും ഇതു തന്നെ. കൂട്ടുകുടുംബങ്ങള്‍ ഉണ്ടായിരുന്നപ്പോള്‍ കുറച്ചെങ്കിലും ഉണ്ടായിരുന്ന ഈ മൂല്യങ്ങള്‍ ഇപ്പോള്‍ പൂര്‍ണ്ണമായും നശിച്ചുകഴിഞ്ഞിരിക്കുന്നു. ഒരു ബിസിനസ് വളര്‍ന്നുവരുന്നത് ഒരു കൂട്ടം ആളുകളുടെ പരസ്പര വിശ്വാസംകൊണ്ടും സഹവര്‍ത്തിത്വം കൊണ്ടുമാണെന്ന് നമുക്കറിയാം.
ഇത് താരതമ്യേന കുറവായ ഒരു വിഭാഗത്തിന് (പലപ്പോഴും സഹായ മനഃസ്ഥിതി കുറവായി കണ്ടിട്ടുണ്ട്. വളരെ നല്ല രീതിയില്‍ ഈ ഗുണങ്ങള്‍ ഉള്ള ഒരുപാട് ആളുകള്‍ ഹിന്ദുമതത്തില്‍ ഉണ്ടെന്നുള്ള കാര്യം വിസ്മരിക്കുന്നില്ല) എങ്ങനെ ബിസിനസില്‍ മുന്നേറാന്‍ കഴിയും? ബിസിനസ് എന്നാല്‍ 'റിസ്‌ക്' തന്നെയാണ്. 'റിസ്‌ക്' എടുക്കുന്ന കാര്യത്തിലും പുറകിലാണ് ഹിന്ദുക്കള്‍ എന്ന് പറയാതെ വയ്യ.
അങ്ങനെ വരുമ്പോള്‍ ഈ മനോഭാവം തലമുറകളില്‍ നിന്ന് തലമുറകളിലേക്ക് കൈമാറ്റം ചെയ്യപ്പെടുകയും റിസ്‌ക് ഇല്ലാത്ത ചെറിയ ബിസിനസുകളിലേക്കും ജോലികളിലേക്കും മാത്രമായി അവര്‍ ഒതുങ്ങിപ്പോവുകയും ചെയ്യുന്നു. ഹിന്ദു മതത്തിന് അകത്തുതന്നെ വിവിധ ജാതികളില്‍ ഇതിന്റെ ഏറ്റക്കുറച്ചിലുകള്‍ കാണാമെന്നതും ചിന്തിക്കാന്‍ വക നല്‍കുന്നതാണ്.
ക്രിസ്ത്യാനികള്‍ മതം പ്രചരിപ്പിക്കാന്‍ എത്തിയവരും അതിന്റെ ഭാഗം ആയവരും ആയതിനാല്‍ത്തന്നെ 'മാര്‍ക്കറ്റിംഗ്' വിഭാഗത്തില്‍ വിദഗ്ധരാണ്‍ മാത്രമല്ല, പള്ളിയും അതിന്റെ ചുറ്റുപാടുകളും ചിട്ടകളും വേദോപദേശ ക്ലാസുകളും എല്ലാം സാഹോദര്യത്തിന്റെ പാഠങ്ങള്‍ അവര്‍ക്ക് ചെറുപ്പത്തിലെ എത്തിച്ചുകൊടുക്കുന്നു. ഒരു കോര്‍പ്പറേറ്റ് സ്ട്രക്ചര്‍ ഉള്ള ഈ മത വിഭാഗം കുറെക്കൂടി അച്ചടക്കത്തോടെ മതവിശ്വാസങ്ങള്‍ പഠിപ്പിക്കുന്നു.
എന്നാല്‍ പാശ്ചാത്യ സംസ്‌കാരത്തിന്റെ ചില അംശങ്ങളും കേരള സമൂഹത്തിന്റെ മൊത്തത്തിലുള്ള കാഴ്ചപ്പാടും തമ്മിലുള്ള ചില വിരോധാഭാസങ്ങളുടെ വടംവലിയാല്‍ മുന്നോട്ടുള്ള യാത്രയില്‍ പൂര്‍ണ്ണമായ വ്യക്തത കൈവരിക്കാന്‍ പലര്‍ക്കും കഴിയാതെ പോകുന്നു. അതിനാല്‍ത്തന്നെ ക്രിസ്തുമത വിശ്വാസികളില്‍ മിക്കവര്‍ക്കും ബിസിനസ് ഉണ്ടാകുമെങ്കിലും വളരെ വലിയ രീതിയില്‍ എത്തിയവര്‍ ചുരുക്കമാണ്.
ഒരു കണ്‍സള്‍ട്ടന്റ് എന്ന നിലയില്‍ എന്നെ അമ്പരപ്പിച്ചിട്ടുള്ളത് കേരളത്തിലെ ഇസ്ലാം മതത്തില്‍പ്പെട്ട ബിസിനസുകാര്‍ തന്നെയാണ്. ശൂന്യതയില്‍ നിന്ന് ബിസിനസുണ്ടാക്കുന്നവരാണ് പലരും. പലരില്‍ നിന്നും പഠിക്കാനും ഏറെയുണ്ടാകും.
ഒരുപക്ഷേ നേരത്തെ പറഞ്ഞ ഘടകങ്ങള്‍ ശരിയായ അളവില്‍ ചെറുപ്പത്തിലേ ലഭിക്കുന്നതാകാം കാരണം. മറ്റുള്ളവരെ മനസിലാക്കാനും വിശ്വസിക്കാനും സഹായിക്കാനുമുള്ള മനോഭാവം എടുത്തുപറയാതെ വയ്യ. അതിനാല്‍ത്തന്നെ ബിസിനസുകള്‍ തുടങ്ങുമ്പോള്‍ പണത്തിനു ബുദ്ധിമുട്ട് കണ്ടിട്ടില്ല.
വളരെ വലിയൊരു സൗഹൃദവലയം കാത്തു സൂക്ഷിക്കുന്നതുകൊണ്ട് തന്നെ ആളുകളെ ജോലിക്കെടുക്കുന്നത് മുതലുള്ള എല്ലാ കാര്യങ്ങളിലും ഒപ്പംനില്‍ക്കാന്‍ ഒരുപാട് പേരുണ്ടാകും. വിശ്വാസം 'റിസ്‌ക്' കുറയ്ക്കുന്നുവെന്ന സത്യം മനസിലാക്കുന്നതുകൊണ്ട്, ബിസിനസിലേക്ക് ഇറങ്ങുമ്പോള്‍ ഉണ്ടാകുന്ന സ്ഥിരം പേടിയും ഇവര്‍ക്ക് കാണാറില്ല.
ലോകം കീഴടക്കുന്ന ബിസിനസ് സാമ്രാജ്യങ്ങള്‍ കെട്ടിപ്പടുക്കുന്നതില്‍ ഇവരുടെ സംഭാവന വളരെ വലുതാണ്.
ഇതുകൊണ്ടൊക്കെ തന്നെയാണ് മലബാര്‍ ബിസിനസ് കേന്ദ്രമാകുന്നതും തെക്കന്‍ കേരളം മന്ദഗതിയില്‍ മാത്രം വികസിക്കുന്നതും. ഇത് ഏതെങ്കിലും മതത്തെ പ്രീണിപ്പിക്കാനുള്ള എഴുത്തല്ല.
ചുറ്റും നടക്കുന്ന ചില കാര്യങ്ങള്‍ യാഥാര്‍ഥ്യ ബോധത്തോടെ പങ്കുവെച്ചെന്നേയുള്ളൂ.. എല്ലാ മതങ്ങളിലും നല്ലവരും ചീത്തയായ ആള്‍ക്കാരും കഴിവുള്ളവരും ഇല്ലാത്തവരും ഉണ്ടെന്ന് മനസിലാക്കിക്കൊണ്ട് തന്നെ!
ഇതില്‍ നിന്ന് നമുക്കെല്ലാം പഠിക്കാന്‍ ഏറെയുണ്ട്. അത് കുട്ടികളെ വളര്‍ത്തി വലുതാക്കുന്നതിനെ കുറിച്ചാണ്. ബിസിനസുകാരന്‍ ആക്കാനല്ല...ഒരു നല്ല മനുഷ്യനാക്കാന്‍! ഒരു നല്ല മനുഷ്യനേ ആത്യന്തികമായി ഒരു നല്ല ബിസിനസുകാരനാകാന്‍ പറ്റൂ എന്ന തിരിച്ചറിവോടെ.

Saturday, September 26, 2015

'സാധനം കയ്യിലുണ്ട്'പക്ഷെ എങ്ങനെ വിറ്റഴിക്കും?



ഒരുപക്ഷേ, കേരളത്തില്‍ ഏറ്റവും അധികം ആളുകള്‍ ചിന്തിക്കുകയും സമയം ചെലവഴിക്കുകയും ചെയ്യുന്ന കാര്യങ്ങളില്‍ ഒന്ന് ഇതായിരിക്കും. വിറ്റഴിക്കാന്‍ കയ്യില്‍ ഒരുപാട് പ്രൊഡക്ട്‌സ് ഉണ്ടെങ്കിലും എങ്ങനെ വില്‍ക്കുമെന്ന് ഒരു ധാരണയും ഇല്ലാത്തവര്‍. പ്രത്യേകിച്ചും ചെറുകിട വ്യവസായങ്ങള്‍ തുടങ്ങുന്നവര്‍, കര്‍ഷകര്‍, റീട്ടെയ്ല്‍ ഷോപ്പ് ഉടമകള്‍... മാര്‍ക്കറ്റിംഗ് ഇവര്‍ക്കെല്ലാം കിട്ടാക്കനിയാണ്...!
ഒരു പഴയ സുഹൃത്ത് ശിവാനന്ദന്‍ എന്നെ കാണാന്‍ വരുന്നത്
രണ്ടാഴ്ച മുമ്പാണ്. കയ്യില്‍ ഒരു പൊതിയും ഉണ്ടായിരുന്നു. സംസാരിച്ചു വന്നപ്പോഴാണ് മനസിലായത്, ശിവാനന്ദന്‍ ഇന്നൊരു ബിസിനസുകാരനാണ്. ചിപ്‌സ്, പക്കാവട, മിക്‌സ്ച്ചര്‍ തുടങ്ങി ഇരുപതോളം ഇനങ്ങളാണ് പുള്ളിയുടെ പ്രൊഡക്ട്‌സ്. എല്ലാത്തിന്റേയും ഓരോ പായ്ക്കറ്റ് വീതം ശിവന്‍ കയ്യില്‍ കരുതിയിരുന്നു. എംബി എക്ക് പഠിക്കുമ്പോഴാണ് എനിക്ക് ശിവാനന്ദനെ പരിചയം. ഒരു മാനേജ്‌മെന്റ് മീറ്റിന് പോയപ്പോള്‍ വളരെ ആത്മവിശ്വാസത്തോടെ ഒരു പേപ്പര്‍ അവതരിപ്പിച്ച വിദ്യാര്‍ത്ഥി. അന്നവന് ആഗ്രഹം ഏതെങ്കിലും വിദേശ കമ്പനിയുടെ തലപ്പത്ത് എത്താനായിരുന്നു. ഫിലിപ് കോട്‌ലറിന്റെ മാര്‍ക്കറ്റിങ്ങ് തന്ത്രങ്ങള്‍ മനപാഠമാക്കി, പിന്നീട് അവന്‍ പല ഇന്റര്‍വ്യൂകളും അറ്റന്റ് ചെയ്തു. അതിലൊന്നില്‍ അവന്‍ ചേരുകയും നല്ല രീതിയില്‍ മുന്നോട്ടു പോകുകയും ചെയ്തു. അതിനിടയിലാണ് അമ്മയ്ക്ക് രോഗം മൂര്‍ച്ഛിച്ച് ശിവന്‍ നാട്ടിലേക്ക് തിരിച്ചുവരുന്നത്. ശിവാനന്ദന്റെ അച്ഛനും അമ്മയും നാട്ടില്‍ ഒരു ചെറിയ ടീ സ്റ്റാള്‍ നടത്തുകയായിരുന്നു. അമ്മയെ ശുശ്രൂഷിക്കാന്‍ ആരുമില്ലെന്ന് വന്നപ്പോള്‍ ശിവാനന്ദന്‍ ജോലി ഉപേക്ഷിച്ച്, നാട്ടില്‍ത്തന്നെ കൂടി. ആയിടയ്ക്കാണ് അയാള്‍ അത് ശ്രദ്ധിച്ചത്.
പൂട്ടിക്കിടന്ന ആ ചായക്കട അന്വേഷിച്ച് പലരും വരുന്നു. നിരാശരായി തിരിച്ചു പോകുന്നു. തന്റെ സ്വന്തം ചായക്കടയില്‍ ലഭിച്ചിരുന്ന ഒരു 'സ്‌പെഷല്‍ സുഖിയന്‍' ആണ് ഇതിനുകാരണം എന്ന് ശിവന്‍ മനസിലാക്കി. ഏലയ്ക്കായും ജാതിപത്രിയും ചെറുപയര്‍ ചേര്‍ത്തുള്ള അമ്മയുടെ ഒരു ടെക്‌നിക്കായിരുന്നു ആ രുചിയുടെ അടിസ്ഥാനം. അന്നാദ്യമായി ശിവന് തന്റെ ആ കൊച്ചുചായക്കടയെക്കുറിച്ച് അഭിമാനം തോന്നി. അമ്മയുടെ അസുഖം മാറിയതിന് പിറ്റേദിവസം തന്നെ ശിവാനന്ദന്‍ കട തുറന്നു. സുഖിയനായിരുന്നു പ്രധാന ഐറ്റം. അതില്‍തന്നെ അഞ്ചോ ആറോ തരങ്ങള്‍ ഉണ്ടായിരുന്നു. സുഖിയനെക്കുറിച്ചറിഞ്ഞ് പല സ്ഥലങ്ങളില്‍ നിന്നും ആളുകള്‍ വന്നുകൊണ്ടിരുന്നു. സുഖിയന്‍ കഴിച്ച് ബോറടിക്കാതിരിക്കാന്‍, ഒപ്പം പുതിയ പലഹാരങ്ങളും ശിവന്‍ അവരിലേക്കെത്തിച്ചു.
സ്വാദിഷ്ടമായതും വ്യത്യസ്തമായതുമായ രുചികളുടെ മാര്‍ക്കറ്റ് മനസ്സിലാക്കിയ അയാള്‍ ഇത്തരം പലഹാരങ്ങള്‍ കൂടുതലായി ഉല്‍പ്പാദിപ്പിക്കാനാരംഭിച്ചു. ഇന്ന് ഏകദേശം 2500 ഓളം കടകളിലേക്ക് അയാള്‍ സാധനങ്ങള്‍ എത്തിക്കുന്നുണ്ട്. 5 സ്‌പെഷല്‍ ടീ സ്റ്റാളുകളും സ്വന്തമായുണ്ട്. എന്തെല്ലാം ഘടകങ്ങളാണ് ശിവാനന്ദനെ ഒരു ബിസിനസുകാരനാക്കിയത് എന്നു നോക്കാം.
ഉല്‍പ്പന്നം ഉഷാറാകണം
ചുറ്റുമുള്ള കസ്റ്റമേഴ്‌സിന് അനുയോജ്യമായ ഉല്‍പ്പന്നം അഥവാ സേവനം ആണോ നമ്മള്‍ കൊടുക്കുന്നത് എന്നത് വളരെ പ്രധാനമാണ്. പലരും തങ്ങള്‍ക്കിഷ്ടമുള്ള പ്രൊഡക്ടുകള്‍ വിപണനം ചെയ്യാനാണ് ശ്രമിക്കുന്നത്. ആളുകള്‍ക്ക് ആവശ്യമുള്ള, എന്നാല്‍ അല്‍പം പ്രത്യേകതകളോടെ അവരെ ആകര്‍ഷിക്കാന്‍ കഴിവുള്ള
പ്രൊഡക്ടുകളേ വിജയിക്കൂ. ശിവാനന്ദന്റെ അമ്മയുണ്ടാക്കിയിരുന്ന സുഖിയന്‍ അത്തരത്തിലൊന്നാണ്. എന്നാല്‍ അത് എല്ലാ കാലത്തേക്കും ആളുകള്‍ക്ക് പ്രിയപ്പെട്ടതായിക്കൊള്ളണമെന്നില്ല. അതിനാല്‍ തന്നെ പ്രൊഡക്ടിനെക്കുറിച്ച് സ്ഥിരമായി പഠിക്കുകയും കസ്റ്റമേഴ്‌സില്‍ വരുന്ന മാറ്റങ്ങളനുസരിച്ച് അത് നവീകരികുകയും വേണം. ലൈഫ്‌ബോയ് സോപ്പ് ലൈഫ്‌ബോയ് പ്ലസ് ആയി
രൂപം മാറി അവതരിപ്പിച്ചത് ഒരു ഉദാഹരണമാണ്. ചെറുകിട സംരംഭകരെ സംബന്ധിച്ച് പ്രൊഡക്ടിന്റെ ഗുണനിലവാരം വളരെ പ്രധാനമാണ്. ആദ്യസമയങ്ങളില്‍ ഈ ഗുണനിലവാരമായിരിക്കും പ്രൊഡക്ടിന്റെ ഗതി തീരുമാനിക്കുന്നതില്‍ പ്രധാന ഘടകം.
വിലനിലവാരം മൂല്യമാകുന്നത്...
നിങ്ങളുടെ പ്രൊഡക്ടിനെ വ്യക്തമായി പൊസിഷന്‍ ചെയ്യാന്‍ സാധിക്കുന്ന ഒന്നാണ് അതിന്റെ 'വില'. ആര്‍ക്കുവേണ്ടിയാണ് നിങ്ങള്‍ സാധനങ്ങള്‍ ഉല്‍പ്പാദിപ്പിക്കുന്നതെന്ന് ഉറപ്പുണ്ടെങ്കില്‍, അവര്‍ക്ക് അനുയോജ്യമായ വിലയും നിശ്ചയിക്കണം. നമ്മുടേതുപോലെയുള്ള ഉല്‍പ്പന്നം മാര്‍ക്കറ്റില്‍ ഇല്ലെന്ന് ആളുകള്‍ക്ക് തോന്നിയാല്‍ അവര്‍ എന്തുവിലയും നല്‍കി വാങ്ങിയെന്നുവരാം. പക്ഷെ, എടുത്തുപറയത്തക്ക സവിശേഷതകള്‍ ഇല്ലാത്ത ഉല്‍പ്പന്നത്തിന് ഒരുപാട് മത്സരം ഉള്ള ഒരു വിപണിയില്‍ വലിയ വിലവച്ചുകൊണ്ട് മുന്നേറാന്‍ പ്രയാസമായിരിക്കും. അതിനാല്‍ വലിയ പ്രത്യേകതകള്‍ ഇല്ലാത്ത ഉല്‍പ്പന്നമാണെങ്കില്‍ താരതമ്യേന ചെറിയ വിലയില്‍ തുടങ്ങുന്നതാകും ഉചിതം.
ലഭ്യത എന്ന 'കടമ്പ'
ഉല്‍പ്പന്നത്തിന്റേയോ സേവനത്തിന്റേയോ ലഭ്യത എന്നത് പല ബിസിനസുകാരും അവസാനം മാത്രം ചിന്തിക്കുന്ന കാര്യമാണ്. ഏതെങ്കിലും തരത്തില്‍ നമ്മുടെ സേവനത്തേയും ഉല്‍പ്പന്നത്തേയും കുറിച്ച് അറിഞ്ഞുവരുന്നവര്‍ക്ക് അതിന്റെ ലഭ്യത ഉറപ്പുവരുത്തേണ്ടത് ഓരോ ബിസിനസുകാരന്റേയും കടമയാണ്. ഒരുതവണ ഉല്‍പ്പന്നം ലഭിക്കാതെ വന്നാല്‍ ആ കസ്റ്റമര്‍ എന്നെന്നേക്കുമായി നഷ്ടപ്പെട്ടേക്കാം. പുതിയ ഉല്‍പ്പന്നങ്ങളുമായി റീട്ടെയ്ല്‍ ഷോപ്പുകളില്‍ പോകുമ്പോള്‍ 'ഇത് സ്ഥിരമായി സപ്ലൈ ചെയ്യാനുള്ള സംവിധാനമുണ്ടാകുമോ?' എന്നതാണ് അഭിമുഖീകരിക്കേണ്ടി വരുന്ന പ്രധാന ചോദ്യം.
നല്ല ഒരു ഡിസ്ട്രിബ്യൂഷന്‍ സിസ്റ്റം ഉണ്ടാക്കിയെടുക്കുകയെന്നത് ഏതൊരു മാര്‍ക്കറ്റിങ്ങിന്റേയും ആദ്യപടിയാണ്. ചെറുകിട സംരംഭകരില്‍ ഭൂരിഭാഗവും ആദ്യസമയങ്ങളില്‍ സ്വന്തമായിതന്നെ ഈ ചുമതല ഏറ്റെടുത്തവരാണ്. പുതിയ ഉല്‍പ്പന്നമാണെങ്കില്‍ ഷോപ്പുകളില്‍ അതിന് ഒരു സ്ഥലം കിട്ടുന്നതുതന്നെ പ്രയാസമാണ്. അതിനാല്‍ പ്രൊഡക്ടിന്റെ വിശ്വാസ്യത ഉറപ്പുവരുത്താന്‍ ഓണര്‍ തന്നെയാകും നല്ലത്. (ചെറുകിട സംരംഭകര്‍ക്കുള്ള പ്രായോഗികമായ രീതി മാത്രമാണിത്) ശിവാനന്ദനും ചെയ്തത് ഇതുതന്നെയാണ്. നല്ല ശുദ്ധ വെളിച്ചെണ്ണയില്‍ വറുത്തെടുത്ത അപൂര്‍വ്വമായ രുചിയുള്ള പലഹാരങ്ങള്‍, സ്വന്തമായി ഷോപ്പുകളില്‍ പോയി വിതരണം ചെയ്തു. ഒപ്പം റീട്ടെയ്‌ലറിന് നല്ല ഒരു മാര്‍ജിനും കൂടി കൊടുത്താല്‍, കടയുടമയ്ക്കും അത് വിറ്റഴിക്കാന്‍ പ്രചോദനമാകും. ഒരു കടയുടമ വിചാരിച്ചാല്‍ ഏത് പുതിയ പ്രൊഡക്ടും ഒറ്റദിവസം കൊണ്ട് വിറ്റുതീര്‍ക്കാം എന്നത് മറക്കരുത്.
ആളുകള്‍ എങ്ങനെ അറിയും?
ഉല്‍പ്പന്നമാണ് കൈവശമുള്ളതെങ്കില്‍, രണ്ട് മാര്‍ഗങ്ങളാണുള്ളത്. ഒന്നുകില്‍ കോടികള്‍ മുടക്കിയുള്ള പരസ്യ പ്രചാരണങ്ങളിലേക്ക് പോകാം. അല്ലെങ്കില്‍ നിശബ്ദമായി, തങ്ങള്‍ നോട്ടമിടുന്ന കസ്റ്റമേഴ്‌സിനെ ലക്ഷ്യമാക്കി പ്രചാരണം സംഘടിപ്പിക്കാം. ഐടിസി പോലുള്ള വന്‍കിട കമ്പനികള്‍ തങ്ങളുടെ പരസ്യങ്ങള്‍ക്കുവേണ്ടി ആയിരക്കണക്കിന് കോടി രൂപയാണ് മുടക്കുന്നത്. വലിയൊരു മാര്‍ക്കറ്റിനെ ലക്ഷ്യമാക്കുമ്പോള്‍ അതല്ലാതെ മാര്‍ഗവുമില്ല. എന്നാല്‍ ചെറിയ രീതിയിലൂടെ തുടങ്ങി വലുതായ ബ്രാന്‍ഡുകളും അനവധിയുണ്ട്. മഞ്ഞള്‍, ചന്ദ്രിക, മെഡിമിക്‌സ് സോപ്പുകളെല്ലാം ഉദാഹരണങ്ങളാണ്. നല്ല പാക്കേജിങ് ഉണ്ടാകേണ്ടത് അത്യന്താപേക്ഷിതമാണ്. ഡിസൈന്‍ ചെലവ് ലാഭിക്കാന്‍ മോശം
പായ്ക്കുകള്‍ ഉണ്ടാക്കുന്നത് ഉല്‍പ്പന്നത്തെ കൊല്ലുന്നതിന് തുല്യമാണ്. നല്ല പാക്കേജിനൊപ്പം, നല്ല ബ്രോഷറും ഷോപ്പുകളില്‍ പ്രദര്‍ശിപ്പിക്കാന്‍ കുറച്ച് പോസ്റ്ററുകളും റാക്കുകളുമുണ്ടെങ്കില്‍ പരസ്യം പൂര്‍ണമായും ഒഴിവാക്കാം. റീട്ടെയ്‌ലറിന് നല്ല മാര്‍ജിനും ചില ഓഫറുകളും കൂടി നല്‍കിയാല്‍ സാധനം പതിയെ വിറ്റഴിഞ്ഞു തുടങ്ങും. ചെറിയ സ്ഥലങ്ങളില്‍ നോട്ടീസുകളിലൂടെ കസ്റ്റമേഴ്‌സിന്റെ അടുത്തും അവബോധം വളര്‍ത്തിയെടുക്കാം. സ്‌കൂള്‍, കോളെജ്, ക്ലബ്ബുകള്‍ തുടങ്ങി ഒരുകൂട്ടം ആളുകള്‍ എത്തുന്ന സ്ഥലങ്ങള്‍ കേന്ദ്രീകരിച്ചും പ്രചാരണം നടത്താം. കടയില്‍ നിന്നും ഉല്‍പ്പന്നം വിറ്റുതുടങ്ങിയാല്‍ ആദ്യ പരീക്ഷ പാസായെന്ന് പറയാം. പിന്നീട് കൂടുതല്‍ ആളുകളെ വച്ച് കൂടുതല്‍ സ്ഥലങ്ങളിലേക്ക് ഉല്‍പ്പന്നം എത്തിക്കാം. ഓര്‍ത്തോളൂ... ഒറ്റയ്ക്ക് തുടങ്ങിയ ശിവാനന്ദന് കീഴില്‍ ഇന്ന് മുപ്പതോളം മാര്‍ക്കറ്റിംഗ് സ്റ്റാഫുണ്ട്!
ആളുകളും രീതികളും പ്രധാനം
ബിസിനസ് വലുതാകുമ്പോള്‍ കൂടെയുണ്ടാകുന്ന ആളുകള്‍ക്കും നമ്മുടെ അതേ മനോഭാവമായിരിക്കണം. ഗുണനിലവാരമുള്ള ഉല്‍പ്പന്നങ്ങള്‍, അതൊട്ടും ചോര്‍ന്നുപോകാതെ വിപണിയിലെത്തിക്കാന്‍ ശ്രമിക്കണം. മാത്രമല്ല, കാര്യങ്ങള്‍ ചെയ്യുന്ന രീതികള്‍ വ്യക്തമായി കുറിച്ചുവയ്ക്കണം. അല്ലെങ്കില്‍, ഓരോരുത്തരും തങ്ങള്‍ക്കറിയുന്ന ഇഷ്ടമുള്ള രീതികളില്‍ കാര്യങ്ങള്‍ ചെയ്തുകൂട്ടും. അത് ഉല്‍പ്പന്നത്തിന്റേയും കമ്പനിയുടേയും ഇമേജിനെ തന്നെ ബാധിച്ചെന്നുവരാം. ശിവാനന്ദന്റെ അമ്മയുണ്ടാക്കിയിരുന്ന അതേ രുചിക്കൂട്ടുകള്‍, അതേപടി എല്ലാവരിലുമെത്തിച്ചപ്പോഴാണ് അദ്ദേഹം വിജയം വരിച്ചത്. കേരളത്തിലെവിടെ പോയാലും തലയില്‍ വിശറിത്തൊപ്പിയുമായി, ബീറ്റ്‌റൂട്ട് മസാലദോശ കൊണ്ടുവരുന്ന ഇന്ത്യന്‍ കോഫിഹൗസിലെ ബെയററുടെ രൂപം മനസില്‍ നിന്ന് മായാത്തതും ഇതേ കാരണംകൊണ്ടാണ്.
ശിവാനന്ദന്‍ ഇപ്പോള്‍ വന്നിരിക്കുന്നത് പലഹാരം തരാന്‍ മാത്രമല്ല. ബിസിനസ് അടുത്ത സംസ്ഥാനങ്ങളിലേക്കുകൂടി വ്യാപിപ്പിക്കാനുള്ള സ്ട്രാറ്റജി ചര്‍ച്ച ചെയ്യാന്‍ കൂടിയാണ്...! 'സാധനം കയ്യിലുണ്ടോ?' എങ്കില്‍ നിങ്ങളും റെഡിയായിക്കോളൂ...

ട്രെയിനിങ്ങിലൂടെ 'സെയില്‍സ്' വര്‍ദ്ധിക്കുമോ?




ട്രെയിനിങ്ങിലൂടെ നിങ്ങള്‍ക്ക് 'സെയില്‍സ്' വര്‍ദ്ധിക്കുമോ? പെട്ടെന്നുള്ള നിങ്ങളുടെ ഉത്തരം 'ഇല്ല' എന്നായിരിക്കും. അതിനുകാരണം 'ട്രെയിനിങ്ങ്' എന്ന പേരില്‍ നടക്കുന്നതില്‍ കൂടുതലും വെറും പ്രഭാഷണങ്ങള്‍ മാത്രമാണ് എന്നതാണ്


ഒരു ട്രെയിനിങ്ങിന്റെ ഫലപ്രാപ്തി എങ്ങനെ അളക്കാം എന്ന് ആലോചി ക്കാം...! കിര്‍ക്ക് 
പാട്രിക് എന്ന മാനേജ്‌മെന്റ് വിദഗ്ധന്‍ ഇതിനായി 4 സ്റ്റെപ്പുള്ള ഒരു ടെക്‌നിക് വികസിപ്പിച്ചെടുത്തിട്ടുണ്ട്. ഏതൊരു ട്രെയിനിങ്ങിലും അത് അറ്റന്റ് ചെയ്യുന്നവരുടെ മനോഭാവം, താല്‍പ്പര്യം, ശ്രദ്ധ എന്നിവ പ്രധാനമാണ്. മനോഭാവം വ്യക്തികള്‍ക്കനുസരിച്ച് വ്യത്യസ്തമായിരിക്കാം. താല്‍പ്പര്യം പലപ്പോഴും ട്രെയിന്‍ ചെയ്യപ്പെടുന്ന വിഷയത്തിന്റെ പ്രസക്തിയുമായി ബന്ധപ്പെട്ടിരിക്കുന്നു. ശ്രദ്ധയാകട്ടെ, പലപ്പോഴും ട്രെയിനറിന്റെ കഴിവിനനുസരിച്ച് മാറുകയും ചെയ്യുന്നു. ഇതെല്ലാം കൂടിച്ചേരുമ്പോഴാണ് ട്രെയിനിങ്ങ് അറ്റന്റ് ചെയ്യുന്ന ഒരാളുടെ മുഖത്ത്, അത് ഫലവത്തായി എന്നതിന്റെ ആ തൃപ്തി കാണാന്‍ സാധിക്കുന്നത്. അതിനാല്‍ തന്നെ നല്ല ഒരു ട്രെയിനിങ്ങ് ഇവാലുവേഷന്റെ ആദ്യപടി, ട്രെയിനിങ്ങ് അറ്റന്റ് ചെയ്തവരെ സൂക്ഷമമായി നിരീക്ഷിക്കലാണ്. നിര്‍ഭാഗ്യവശാല്‍ 'ട്രെയിനര്‍' വേഷം കെട്ടിവരുന്ന പലര്‍ക്കും ട്രെയിനീസിന്റെ മാനസികാവസ്ഥ മനസിലാകാറില്ല. ഇത്തരം ട്രെയിനിങ്ങ് സെഷ
നുകള്‍, അറ്റന്റ് ചെയ്യുന്നവരെ ബോറടിപ്പിക്കും എന്നുമാത്രമല്ല, അവര്‍ക്ക് ട്രെയിനി ങ്ങിനോട് സ്ഥായിയായ വെറുപ്പ് ഉണ്ടാക്കിയെടുക്കുകയും ചെയ്യും.
അടുത്തപടി 'പരീക്ഷ' ആണ്. പരീക്ഷയൊക്കെ സ്‌കൂളില്‍ വച്ച് അവസാനിപ്പിച്ചതല്ലേ എന്ന മനോഭാവം കാരണം 99% ട്രെയിനേഴ്‌സും ട്രെയിനീസും അതിന് മെനക്കെടാറില്ല. എന്നാല്‍ വിഷയം എന്തുതന്നെയായാലും അത് മനസിലാക്കിയോ എന്നറിയാനുള്ള വ്യക്തമായ മാര്‍ഗമാണ് 'ടെസ്റ്റുകള്‍'. ബഹുരാഷ്ട്ര കമ്പനികള്‍ക്കെല്ലാം ഏതൊരു ട്രെയിനിങ്ങിനു ശേഷവും 'ടെസ്റ്റുകള്‍' നിര്‍ബന്ധമാണ്. ടെസ്റ്റ് പാസാകാത്തവര്‍ വീണ്ടും ട്രെയിനിങ്ങ് അറ്റന്റ് ചെയ്യുകയും വേണം. നിങ്ങള്‍ നടത്തുന്നത് എന്ത് ട്രെയിനിങ്ങും ആയിക്കൊള്ളട്ടെ, അതിനോടനുബന്ധിച്ച് ഒരു 'എക്‌സാം' അഥവാ 'ടെസ്റ്റ്' ഇല്ലെങ്കില്‍ ആ ട്രെയിനിങ്ങ് മുഴുവനാകുന്നില്ല.
ടെസ്റ്റ് പാസായതുകൊണ്ട് മാത്രമായോ? പോരാ! അത് ജോലിയില്‍ പ്രാ വര്‍ത്തികമാക്കുകകൂടി ചെയ്യേണ്ടതുണ്ട്. ഇനിമുതല്‍ എല്ലാ റിപ്പോര്‍ട്ടുകളും വൈകിട്ട് 5 മണിക്ക് ഇ മെയില്‍ വഴി അയയ്ക്കണമെന്ന നിര്‍ദേശം ട്രെയിനിങ്ങിലൂടെ നല്‍കിയിട്ടും, അത് പ്രാവര്‍ത്തികമാക്കുന്നില്ലെങ്കില്‍ എന്തുചെയ്യും? ഇവിടെയാണ് 'ഫോളോ അപ്' ട്രെയിനികളുടെ പ്രസക്തി. ഇതുതന്നെയാണ് കിര്‍ക് 
പാട്രിക് പറയുന്ന മൂന്നാമത്തെ സ്റ്റെപ്പും. ഒരു ട്രെയിനിങ്ങ് കഴിഞ്ഞ് ഒരാഴ്ചയ്ക്കുള്ളില്‍ തന്നെ ഒരു 'ഫോളോ അപ്' ആന്‍ഡ് 'റിവ്യൂ' ഉണ്ടെങ്കില്‍, എന്തുകൊണ്ട് 5 മണിക്ക് റിപ്പോര്‍ട്ടുകള്‍ അയക്കുന്നില്ലെന്ന് മനസിലാക്കാം. അറിയാഞ്ഞിട്ടാണെങ്കില്‍ പഠിപ്പിച്ചുകൊടുക്കാം. 
പ്രായോഗികമല്ലെങ്കില്‍ (പ്രായോഗികമാക്കേണ്ടതാണ്. അതുകൊണ്ടാണല്ലോ ട്രെയിനിങ്ങ് കൊടുത്തത്) റീ ഡിസൈന്‍ ചെയ്യാം. അതല്ല, ആറ്റിറ്റിയൂഡ് പ്രോ ബ്ലം ആണെങ്കില്‍ ഈ പ്രവൃത്തി ചെയ്യുന്നതുകൊണ്ട് അയാള്‍ക്കുള്ള ഗുണവും ചെയ്തില്ലെങ്കില്‍ വരാന്‍ പോകുന്ന ദോഷങ്ങളും പറഞ്ഞുകൊടുക്കാം. പക്ഷെ, മിക്കവാറും സ്ഥലങ്ങളില്‍ ആദ്യത്തെ ട്രെയിനിങ്ങിനുശേഷം സ്ഥാപനത്തിന് പുറത്തുനിന്നോ അകത്തുനിന്നോ ഒരു ഫോളോഅപ്പും ഉണ്ടാകാറില്ല. അതിനാല്‍തന്നെ, ട്രെയിനിങ്ങില്‍ പറഞ്ഞ കാര്യങ്ങളെല്ലാം പതിയെ പതിയെ ഇല്ലാതാകുന്നു.
ഇവിടെയും അവസാനിക്കുന്നില്ല ഒരു യഥാര്‍ത്ഥ ട്രെയിനറുടെ റോള്‍. കാരണം, ഒരു യഥാര്‍ത്ഥ ട്രെയിനിങ്ങ് ഉന്നം വയ്ക്കുന്നത് നിങ്ങളുടെ ബിസിനസില്‍/സെയില്‍സിലുള്ള വര്‍ദ്ധന തന്നെയാണ്. യഥാസമയത്ത് റിപ്പോര്‍ട്ടുകള്‍ അയപ്പിക്കുന്നത് അതിന്റെ ഒരു ഭാഗം മാത്രമാണ്. എല്ലാ ദിവസവും സെയില്‍സ് റിവ്യൂ മീറ്റിങ്ങുകള്‍ ഉണ്ടായിരിക്കണം. ഇതിനോടൊപ്പം എല്ലാ മാസവും ഒരു ട്രെയിനറുടെ സാന്നിധ്യത്തില്‍ റിവ്യു നടത്തുന്നതും നന്നായിരിക്കും. എല്ലാ സെയില്‍സ് സ്റ്റാഫിന്റേയും പ്രതികരണങ്ങള്‍ അറിയാനും അവയ്ക്ക് പരിഹാര മാര്‍ഗങ്ങള്‍ നിര്‍ദേശിക്കാനും, അതുവഴി സെയില്‍സില്‍ ഉണ്ടാകുന്ന പ്രശ്‌നങ്ങളെ മുന്‍കൂട്ടി കാണാനുമെല്ലാം ഇത്തരം റിവ്യൂകള്‍ സഹായകരമാകും. ഇതിലൂടെ തീര്‍ച്ചയായും നിങ്ങളുടെ ബിസിനസ് വാല്യു കൂടുകയും ചെയ്യും.
ഒരുകാര്യം തീര്‍ച്ചയാണ്. ഒറ്റ ദിവസത്തെ ഒരു ട്രെയിനിങ്ങ് പ്രോഗ്രാം, ഒരു സിനിമ കാണുന്നതുപോലെയേ ആകുന്നുള്ളൂ. വ്യക്തമായ ഫോളോഅപ്പുകളിലൂടെ യഥാര്‍ത്ഥ പ്രശ്‌നങ്ങളെ കേന്ദ്രീകരിച്ചുകൊണ്ടുള്ള 'ട്രെയിനിങ്ങ് ആന്‍ഡ് റിവ്യൂ' പ്രോഗ്രാം ആണ് വേണ്ടത്. കേരളത്തിലെ ചെറുകിട സ്ഥാപനങ്ങളില്‍ ഇത്തരം ട്രെയിനിങ്ങുകളിലൂടെ ബിസിനസ് 100 ശതമാനമോ അതിനപ്പുറമോ വര്‍ദ്ധിപ്പിക്കാമെന്നതും സത്യം.

Monday, June 29, 2015

നല്ല സ്റ്റാഫിനെ കിട്ടാനില്ലേ? വിഷമിക്കേണ്ട...!

കഴിഞ്ഞ മാസം, കേരളത്തിലെ ഒരു മുന്‍നിര ബിസിനസുകാരനെ പരിചയപ്പെടാനിടയായി. ഹാര്‍ഡ്‌വെയര്‍, ഗ്രോസറി, റിസോര്‍ട്ട്, പ്ലാസ്റ്റിക് കമ്പനി എന്നിങ്ങനെ വിവിധ ബിസിനസുകള്‍ ചെയ്തു പോന്നിരുന്ന ആളാണ് അദ്ദേഹം...പക്ഷേ, ചോദിച്ചറിഞ്ഞു വന്നപ്പോഴാണ് ഇപ്പോള്‍ ഒന്നും ചെയ്യാതെ പേരക്കുട്ടികളെ നോക്കി വീട്ടിലിരിക്കുകയാണ് എന്ന് മനസ്സിലായത്!

മനുഷ്യരായ മനുഷ്യരെല്ലാം ബിസിനസ് ഒന്നു ക്ലച്ചു പിടിക്കാന്‍ പരക്കം പായുന്ന ഈ കാലത്ത് എന്തേ അങ്ങനെ തോന്നാന്‍ എന്ന് ഞാന്‍ അദ്ദേഹത്തോടു ചോദിച്ചു. അന്ന് അദ്ദേഹം പറഞ്ഞ മറുപടിയാണ് ഈ ലേഖനമെഴുതാന്‍ എന്റെ പ്രചോദനം! ''കഴിഞ്ഞ അഞ്ചു വര്‍ഷമായി ഓരോന്നും ഏല്‍പ്പിച്ചു കൊടുക്കാന്‍ പറ്റിയ ആളിനെ തിരയുന്നു. ഒറ്റയ്ക്ക് ഓടി മടുത്തു. ആരെയും കിട്ടിയില്ല. എന്നാല്‍ പിന്നെ പൂട്ടിക്കെട്ടാമെന്നു വച്ചു!'' തന്റെ ചോരയും നീരും കൊടുത്തു വളര്‍ത്തി വലുതാക്കിയ ബിസിനസ് ഒന്നുമല്ലാതായി പോയതിന്റെ നിരാശ ആ മുഖത്ത് കാണാമായിരുന്നു. ഇത് ഇദ്ദേഹത്തിന്റെ മാത്രം ആശങ്കയല്ല. ഒട്ടുമുക്കാല്‍ ബിസിനസുകാരും ഇന്ന് നേരിടുന്ന ഏറ്റവും വലിയ പ്രതിസന്ധിയാണിത്. പക്ഷേ ഇതിനു വ്യക്തമായ പരിഹാര മാര്‍ഗ്ഗങ്ങളുമുണ്ട്.

മലയാളിയുടെ മായാജാലം!

മറ്റ് ഏതൊരു വര്‍ഗവുമായി തട്ടിച്ചു നോക്കിയാലും മലയാളികള്‍ പൊതുവേ കഴിവ് ഒരല്‍പ്പം കൂടുതലുള്ളവരാണ്. മിക്ക മള്‍ട്ടി നാഷണല്‍ കമ്പനികളുടേയും തലപ്പത്ത് ഒരു മലയാളിയെങ്കിലുമുണ്ടാകും. ഗള്‍ഫ് ഉണ്ടായതു തന്നെ മലയാളി ഉള്ളതു കൊണ്ടാണ്! നമ്മുടെ പൊതു വിജ്ഞാനം, രാഷ്ട്രീയ-സാമൂഹ്യബോധം, ജീവിതരീതി... ഇവയൊക്കെ മറ്റു പലരേക്കാളും ഉന്നത നിലവാരത്തിലുമാണ്. എന്നിട്ടുമെന്തേ നമുക്ക് നല്ല സ്റ്റാഫിനു പഞ്ഞം?

പലരും പറയുന്നത് 'മലയാളി സ്വന്തം നാട്ടില്‍ ഒരു പണിയുമെടുക്കില്ല, എന്നാല്‍ അന്യനാട്ടില്‍ പോയി എന്തു ചെയ്യാനും തയ്യാറാകുന്നു' എന്നാണ്. പക്ഷേ എന്തുകൊണ്ട് അങ്ങനെ സംഭവിക്കുന്നു എന്നും മള്‍ട്ടിനാഷണല്‍ കമ്പനികളില്‍ മലയാളികള്‍ എങ്ങനെ വെന്നിക്കൊടി പാ റിക്കുന്നു എന്നും മനസിലാക്കാന്‍ കഴിഞ്ഞാല്‍ നമ്മുടെ  ഈ പ്രശ്‌നത്തിന് ഉത്തരമായി.
ഒരു നല്ല ജോലിഎന്താണ് ഒരു നല്ല ജോലി അഥവാ എന്തുകൊണ്ട് നിങ്ങള്‍ ഏതെങ്കിലും ഒരു സ്ഥാപനത്തില്‍ ജോലി ചെയ്യാനിഷ്ടപ്പെടുന്നു എന്ന വിഷയത്തില്‍ ഒരു സര്‍വേ നടത്തിയപ്പോള്‍ അവര്‍ പറഞ്ഞ കാരണങ്ങള്‍ ഇതൊക്കെയാണ്. 
1.     ഏല്‍പ്പിക്കുന്ന ഉത്തരവാദിത്തങ്ങളും തീരുമാനം എടുക്കാനുള്ള സ്വാതന്ത്ര്യവും
2.     ശമ്പളവും മറ്റ് ആനുകൂല്യങ്ങളും
3.     നല്ല അന്തരീക്ഷം (ജോലിയില്‍)
4.     പ്രചോദനം തരുന്ന മാനേജ്‌മെന്റ്
5.     പുതിയ കാര്യങ്ങള്‍ പഠിക്കാനുള്ള അവസരം
6.     കരിയര്‍ ഉയര്‍ച്ചയ്ക്കുള്ള സാധ്യതകള്‍
    ഈ ആറു കാര്യങ്ങളെയും സൂക്ഷ്മമായി പഠിച്ചാല്‍ ഇനി ഒരു മലയാളി ബിസിനസുകാരനും നല്ല സ്റ്റാഫില്ലെന്ന കാരണത്താല്‍ ബിസിനസ് നിര്‍ത്തേണ്ടി വരില്ല.

ഉത്തരവാദിത്തം, സ്വാതന്ത്ര്യം

സ്റ്റാഫിന് ഉത്തരവാദിത്തമില്ല എന്ന് പറയുന്നവരാണ് അധികവും. പക്ഷേ എന്തൊക്കെയാണ് അവരുടെ ഉത്തരവാദിത്തങ്ങള്‍ എന്നും പരിധി എന്താണെന്നും അവരില്‍ നിന്ന് നിങ്ങള്‍ പ്രതീക്ഷിക്കുന്നതെന്താണെന്നും വ്യക്തമായി പറഞ്ഞു മനസ്സിലാക്കിയിട്ടുണ്ടോ? ഇനി ഉണ്ടെങ്കില്‍ തന്നെ ഇതിനെ ആസ്പദമാക്കി ആഴ്ച തോറും റിവ്യു നടത്താറുണ്ടോ? ഇല്ലെങ്കില്‍ പ്രശ്‌നം നിങ്ങളുടെ പക്ഷത്താണ്. ചെറിയ കാര്യങ്ങളില്‍ പോലും ഇടപെട്ട്, സ്റ്റാഫിന് തീരുമാനങ്ങളെടുക്കാനോ ഒന്ന് ആത്മവിശ്വാസത്തോടെ സംസാരിക്കാനോ പോലും സമ്മതിക്കാത്ത ബിസിനസുകാരുമുണ്ട്. ഇത്തരം മൈക്രോ മാനേജ്‌മെന്റ് നിര്‍ത്തിയില്ലെങ്കിലും, സ്റ്റാഫ് നന്നാകുമെന്ന പ്രതീക്ഷ വേണ്ട.

ശമ്പളം എന്ന കടമ്പ


പലരും ശമ്പളം തീരുമാനിക്കുന്നത് വെറും ഊഹാപോഹങ്ങളുടെ പുറത്താണ്. 'തല്‍ക്കാലം ഒരു 6000 രൂപ കൊടുക്കാം.' എന്നൊക്കെയാണ് ചിന്തകള്‍. മനസ്സില്‍ ഈ 6000 വെച്ചാണ് ഇന്റര്‍വ്യൂകള്‍ നടത്തുന്നത്. അപ്പോള്‍ പിന്നെ നിങ്ങള്‍ക്ക് കിട്ടുന്നതും 6000 രൂപയുടെ മൂല്യം തന്നെയായിരിക്കും. നിങ്ങള്‍ക്ക് ചെയ്യാനുള്ള ജോലിയുടെ മുഴുവന്‍ സാധ്യതകളും പ്രയോജനപ്പെടുത്താന്‍ കഴിയുന്ന ഒരാളെയാണ് നിങ്ങള്‍ക്ക് വേണ്ടതെന്ന് മനസ്സിലാക്കുക. അത്തരമൊരാള്‍ക്ക് ഇന്‍ഡസ്ട്രി നല്‍കുന്നതിനേക്കാള്‍ ശമ്പളം ഓഫര്‍ ചെയ്യുക. വ്യക്തമായ ടാര്‍ജറ്റുകളിലൂടെയും പ്ലാനുകളിലൂടെയും ബിസിനസ് വര്‍ദ്ധിപ്പിക്കുക. നല്ല ഒരാള്‍ക്ക് നല്ല ശമ്പളം നല്‍കി എടുക്കുന്നതിന്റെ ഗുണങ്ങള്‍ ഏറെയാണ്. ആശയവിനിമയം എളുപ്പമാകും. ഒരുപാട് ഉത്തരവാദിത്തങ്ങള്‍ ഏല്‍പ്പിച്ചുകൊടുക്കാം, കമ്പനി ഇമേജ് വര്‍ദ്ധിക്കുന്നു. മറ്റു സ്റ്റാഫിന് പ്രചോദനമാകുന്നു. ഉയര്‍ന്ന ശമ്പളം കൊടുക്കുന്നതിനാല്‍ മോട്ടിവേഷന്‍ ലെവലും ഉയര്‍ന്നതായിരിക്കും. ഒപ്പം മറ്റു ജോലികള്‍ തേടിപ്പോകാനുള്ള സാധ്യതയും കുറയും.

എന്നാല്‍ ഇത്തരമൊരാളെ കിട്ടുന്നതെങ്ങനെ എന്ന ചോദ്യത്തിനും ഉത്തരമുണ്ട്. 'ഹ്യൂമന്‍ റിസോഴ്‌സസ്' എന്നത് ഇന്‍ഫ്രാസ്ട്രക്ചറിന്റെ അത്രയോ അതില്‍കൂടുതലോ പ്രധാനമാണെന്ന് ചിന്തിച്ചാല്‍ മതി. ഓഫീസ് മോടി പിടിപ്പിക്കാനും അനുബന്ധ കാര്യങ്ങള്‍ക്കുമായി വിനിയോഗിക്കുന്നതിന്റെ ഒരു ചെറിയ ശതമാനമെടുത്ത് ഒരു നല്ല പത്രത്തില്‍ അത്യാവശ്യം വലുപ്പത്തില്‍ ഒരു റിക്രൂട്ട്‌മെന്റ് പരസ്യം നല്‍കുക. കമ്പനിയുടെ ഗുണനിലവാരം കാണിക്കുന്ന തരത്തില്‍ ഡിസൈനും ഉള്ളടക്കവും വരാന്‍ പ്രത്യേകം ശ്രദ്ധിക്കണം. വരുന്ന കോളുകള്‍ പ്രൊഫഷണലിസത്തോടെ കൈകാര്യം ചെയ്യുക കൂടി ചെയ്താല്‍ സംഭവം റെഡി! ഇത്തരത്തില്‍ ഞങ്ങള്‍ കൈകാര്യം ചെയ്തിട്ടുള്ള 99% സാഹചര്യങ്ങളിലും നല്ല ആളുകളെ ലഭിച്ചിട്ടുണ്ടെന്നതു കൂടി ഞാനിവിടെ സാക്ഷ്യപ്പെടുത്തുന്നു.

ഇത്രയും മതിയോ?

ഒരു നല്ല വ്യക്തിയെ നമ്മുടെ കമ്പനിയില്‍ ജോലിക്ക് എടുക്കാന്‍ ഇത്രയും മതി. പക്ഷേ, അയാളെ നില നിര്‍ത്താന്‍ ഇത്രയും പോര! ബിസിനസിന് മൊത്തത്തില്‍ ഒരു അടുക്കും ചിട്ടയും പ്രൊഫഷണല്‍ രീതികളും വേണം. പുതുതായി വരുന്ന ആള്‍ ഇതെല്ലാം ശരിയാക്കും എന്നു തെറ്റിദ്ധരിക്കരുത്. മിക്കവരും സിസ്റ്റം ഉണ്ടാക്കി പരിചയം ഉള്ളവരാകില്ല, സിസ്റ്റത്തിനുള്ളില്‍ പരിചയം സിദ്ധിച്ചവരായിരിക്കും. അതിനാല്‍ തന്നെ അത് മാനേജ്‌മെന്റിന്റെ കര്‍ത്തവ്യമാണ്. ജോലി ചെയ്യുന്ന സാഹചര്യങ്ങള്‍ നല്ലതാക്കാനും ശ്രദ്ധിക്കേണ്ടതുണ്ട്. ഒരു നല്ല സെയില്‍സ് മാനേജരെ റിക്രൂട്ട് ചെയ്തിട്ട് ഇരിക്കാന്‍ ഒരു കസേരയില്ലാത്തതിന്റെ പേരില്‍ ഒരാഴ്ചയ്ക്കുള്ളില്‍ പിരിഞ്ഞു പോയ സന്ദര്‍ഭങ്ങളുണ്ട്. (ഏത് കസേരയില്‍ ഇരിക്കണമെന്ന 
നിര്‍ദ്ദേശം പോലും 5 ദിവസമായിട്ടും അദ്ദേഹത്തിന് കിട്ടിയിരുന്നില്ലത്രേ.)

ഗൂഗിള്‍ പോലുള്ള കമ്പനികള്‍ പുതിയ കാര്യങ്ങള്‍ പഠിക്കാനും സ്വന്തമായി പ്രൊജക്ടുകള്‍ ചെയ്യാനും വരെ അവരുടെ സ്റ്റാഫിന് അവസരമൊരുക്കാറുണ്ട്. ഓര്‍ക്കുട്ട് അങ്ങനെ ഉദ്ഭവിച്ച ഒരു പ്രൊഡക്റ്റ് ആണ് എന്നത് നമ്മളെ അത്ഭുതപ്പെടുത്തിയേക്കാം. ഇതിനു പകരം നമ്മളില്‍ പലരും സ്റ്റാഫിന്റെ ഉള്ള കഴിവുകളെ അടിച്ചമര്‍ത്താനും അവരെ കൊച്ചു കൊച്ചു ജോലികളില്‍ തളച്ചിടാനുമാണ് ശ്രമിക്കുന്നത്. സ്വതന്ത്രമായി ചിന്തിക്കാനും പഠിക്കാനും പുതിയ പ്രചോദനങ്ങള്‍ നേടാനും അവസരങ്ങളൊരുക്കിയാല്‍ നിങ്ങളുടെ സ്റ്റാഫിന് ബിസിനസിനെ സ്വന്തം ബിസിനസായി കാണാനും അതിനെ വേറൊരു തലത്തിലേക്ക് കൂട്ടിക്കൊണ്ടു പോകാനും കഴിയും.

ശരിയായി ഡിസൈന്‍ ചെയ്ത പെര്‍ഫോമന്‍സ് അപ്‌റൈസലും കമ്പനി വളരുന്നതിനൊപ്പം വളരാനുള്ള അവസരങ്ങളുമൊക്കെ ഉണ്ടെങ്കില്‍ 'ഹ്യൂമന്‍ റിസോഴ്‌സസ്' നിങ്ങളുടെ ഏറ്റവും വലിയ മുതല്‍ക്കൂട്ടാവും. തീര്‍ച്ച.

ഒന്നുറപ്പിക്കുക. കേരളം ഒരു വൈര ഖനിയാണ്. അതില്‍ നിന്ന് വൈരക്കല്ലുകള്‍ പെറുക്കിയെടുക്കുക മാത്രം ചെയ്താല്‍ മതി.

Wednesday, March 18, 2015

നിങ്ങള്‍ക്കും ഉണ്ടാക്കാം ഒരു ബിസിനസ് പ്ലാന്‍


ബാങ്ക് ലോണെടുക്കാന്‍ നിങ്ങള്‍ എങ്ങനെ വേണമെങ്കിലും ബിസിനസ് പ്ലാന്‍ ഉണ്ടാക്കിയെടുത്തോളൂ. പക്ഷെ ബിസിനസ് വിജയിക്കാന്‍ ശരിയായ, ദിശാബോധമുള്ള ബിസിനസ് പ്ലാന്‍ തന്നെ വികസിപ്പിച്ചെടുക്കുക

ബിസിനസ് തുടങ്ങാന്‍ തുനിഞ്ഞിറങ്ങുന്നവരില്‍ പലരും മനസില്‍ പല പ്ലാനുകളുമായാണ് വരുന്നത്. എന്നാല്‍ പലപ്പോഴും മിക്കതിനും ഒരു അടുക്കും ചിട്ടയും കാണാറില്ല. പിന്നെ ബിസിനസ് പ്ലാന്‍ ഉണ്ടാക്കുന്നത്, ബാങ്ക് ലോണ്‍ ആവശ്യം വരുമ്പോഴാണ്. ലോണ്‍ കിട്ടുന്ന രീതിയില്‍ തട്ടിക്കൂട്ടുന്ന ഒരു കടലാസ് കൂമ്പാരം മാത്രമാണ് അത്തരം ബിസിനസ് പ്ലാനുകളില്‍ പലതും. സംരംഭകനോട് ഒന്നു സംസാരിക്കുക കൂടി ചെയ്യാതെ ഇത്തരത്തിലുള്ള ബിസിനസ് പ്ലാനുകള്‍ ഉണ്ടാക്കുന്ന പലരേയും എനിക്കറിയാം. ഇതില്‍ പലതും ലോണ്‍ കിട്ടാന്‍ സഹായകമായേക്കാം. എന്നാല്‍ യഥാര്‍ത്ഥത്തില്‍ ഒരു ബിസിനസ് പ്ലാന്‍ സഹായകരമാകേണ്ടത്, നിങ്ങളുടെ ബിസിനസിനു തന്നെയാണ്. 

ബിസിനസ് പ്ലാന്‍ എങ്ങനെ വേണം?

നിങ്ങളുടെ ബിസിനസിന് ഗുണം ചെയ്യുന്ന ഒരു ബിസിനസ് പ്ലാന്‍ എങ്ങനെ ഉണ്ടാക്കിയെടുക്കാം എന്ന് നോക്കാം. താന്‍ ചെയ്യാന്‍ പോകുന്ന ബിസിനസിന്റെ പൂര്‍ണമായ രൂപം മനസില്‍ കാണുകയും അതിനെ അതേപടി കടലാസിലേക്ക് പകര്‍ത്തുകയുമാണ് ചെയ്യേണ്ടത്. ബിസിനസ് ചെയ്യുന്നതിന്റെ പ്രധാന ലക്ഷ്യങ്ങളിലൊന്ന് 'ലാഭം' ആണെന്നതുകൊണ്ടു തന്നെ, ബിസിനസ് പ്ലാനും ലാഭകരമായിരിക്കണം!

ഒരു 'എക്‌സിക്യുട്ടീവ് സമ്മറി'യില്‍ നിന്നാണ് ബിസിനസ് പ്ലാനുകള്‍ ആരംഭിക്കേണ്ടത്. ഈ ബിസിനസുകൊണ്ട് നിങ്ങള്‍ ഉദ്ദേശിക്കുന്നതെന്താണെന്നും, അത് എങ്ങനെയായിരിക്കണെം ഫലത്തില്‍ വരേണ്ടത് എന്നിങ്ങനെയുള്ള കാര്യങ്ങളുടെ ഒരു സംക്ഷിപ്ത രൂപമായിരിക്കണം അത്. ഒരു പേജില്‍ കൊള്ളാവുന്ന അത്രയും ചുരുക്കി എഴുതുന്നത് നന്നായിരിക്കും. അടുത്തത് 'ബിസിനസ് ഡിസ്‌ക്രിപ്ഷന്‍' ആണ്. 

നിങ്ങള്‍ ചെയ്യാന്‍ പോകുന്ന ബിസിനസ് രംഗത്തെക്കുറിച്ചുള്ള ഒരു ചെറിയ വിവരണം ഇവിടെ കൊടുക്കാം. ഉദാഹരണത്തിന്, കറിപൗഡര്‍ ബിസിനസ് ചെയ്യാനൊരുങ്ങുന്ന ഒരാള്‍ക്ക്, കേരള മാര്‍ക്കറ്റും ദേശീയ മാര്‍ക്കറ്റും എത്രമാത്രം കറിപൗഡര്‍ ഉപയോഗിക്കുന്നുണ്ടെന്ന് അറിഞ്ഞിരിക്കണം. ഇന്റര്‍നെറ്റില്‍ നിന്നും, പല മാര്‍ക്കറ്റിങ്ങ് ഏജന്‍സികളില്‍ നിന്നും ഇത്തരം വിവരങ്ങള്‍ ലഭ്യമാണ്. ഇപ്പോഴത്തെ കറിപൗഡര്‍ മാര്‍ക്കറ്റിലെ ട്രെന്‍ഡ്, ഡിസ്ട്രിബ്യൂഷന്‍ രീതികള്‍, വില വിവരം, പുതിയ സാങ്കേതികവിദ്യ, ഭാവിയിലെ മാര്‍ക്കറ്റ് എന്നിങ്ങനെ എത്രമാത്രം വിവരങ്ങള്‍ ശേഖരിക്കാന്‍ കഴിയുന്നോ, അത്രയും നല്ലത്. ഇത്തരം കാര്യങ്ങള്‍ കൂടുതല്‍ ആഴത്തില്‍ അറിയുന്നതിനായി ഒരു മാര്‍ക്കറ്റ് സര്‍വ്വെ നടത്തിയാലും തരക്കേടില്ല.

എന്തായിരിക്കണം സ്ട്രാറ്റജി?

ബിസിനസ് പ്ലാനുകളിലെ ഏറ്റവും പ്രധാന ഭാഗങ്ങളിലൊന്നാണ് മാര്‍ക്കറ്റ് സ്ട്രാറ്റജി. മുകളില്‍ പറഞ്ഞ മാര്‍ക്കറ്റിലെ വിവരങ്ങളെ വ്യക്തമായി പഠിച്ച്, അനലൈസ് ചെയ്യുമ്പോഴാണ് സ്ട്രാറ്റജികള്‍ ഉണ്ടാകുന്നത്. ഇതിനുവേണ്ടി ഒരു 'കോംപറ്റീറ്റര്‍ അനാലിസിസ്' കൂടി നടത്തുന്നത് നന്നായിരിക്കും. നിങ്ങള്‍ ചെയ്യുന്ന ബിസിനസ് രംഗത്ത് ഇന്ന് നിലവിലുള്ള പ്രധാനികള്‍ ആരൊക്കെയാണെന്നും അവരുടെ ഉപഭോക്താക്കള്‍ ആരാണെന്നും, അവരുടെ ഉല്‍പ്പന്നത്തിന്റെ പ്രത്യേകതകള്‍ എന്തെല്ലാമാണെന്നും അവരുടെ മാര്‍ക്കറ്റിംഗ് തന്ത്രങ്ങള്‍ എന്തൊക്കെയാണെന്നും വ്യക്തമായി പഠിച്ചിരിക്കണം. ഒരുകാര്യം വ്യക്തമായി മനസിലാക്കുക. കയ്യില്‍ ഒരു നല്ല ഉല്‍പ്പന്നം ഉണ്ട് എന്നതുകൊണ്ടുമാത്രം നിങ്ങള്‍ക്ക് അത് വില്‍ക്കാന്‍ കഴിയണമെന്നില്ല. അതിനെ മാര്‍ക്കറ്റില്‍ ശരിയായ രീതിയില്‍ അവതരിപ്പിക്കാന്‍ കൂടി സാധിക്കണം. നിങ്ങളുടെ 'ടാര്‍ജറ്റ് ഓഡിയന്‍സ്' ആരാണെന്ന് ആദ്യം കണ്ടുപിടിക്കുക. അവരിലേക്കെത്താന്‍, ഏറ്റവും നല്ല മാധ്യമവും, ഒപ്പം തന്നെ അവര്‍ക്ക് ആവശ്യകത തോന്നുന്ന രീതിയിലുള്ള മാര്‍ക്കറ്റിംഗ് മെസേജുകളും ഉണ്ടാക്കിയെടുക്കുക. ഇത്തരത്തിലുള്ള എല്ലാ സ്ട്രാറ്റജികളും ബിസിനസ് പ്ലാനിന്റെ ഈ ഘട്ടത്തില്‍ വരണം. ഇത്തരം കാര്യങ്ങളില്‍ വ്യക്തത ഉണ്ടാക്കാതെ മുന്നോട്ടു പോകുമ്പോഴാണ് ബിസിനസുകള്‍ താളം തെറ്റുന്നത്. കറിപൗഡര്‍ പോലെ മത്സരം വളരെയധികമുള്ള മേഖലകളിലേക്ക് പുതുതായി പ്രവേശിക്കുന്നവര്‍ ഉല്‍പ്പന്നത്തിലോ വിലയിലോ അതിന്റെ പാക്കേജിംഗിലോ ഇതുവരെ കാണാത്ത വ്യത്യസ്തതയുമായി വന്നാലേ പ്രതീക്ഷയ്ക്ക് വകയുള്ളൂ.

അടുത്തതായി ഒരു 'ഡിസൈന്‍ & ഡവലപ്‌മെന്റ്' പ്ലാന്‍ തയ്യാറാക്കുക. നിങ്ങളുടെ ഉല്‍പ്പന്നം വില്‍പ്പനയ്ക്ക് പറ്റുന്നതാക്കിയെടുക്കാന്‍ എന്തൊക്കെ വേണം എന്ന് ചിന്തിക്കുക. ഒരേ ഗുണനിലവാരത്തോടെ ഉല്‍പ്പന്നം ഉണ്ടാക്കാന്‍ കഴിയുന്ന ഒരു രീതിയോ അങ്ങനെ തരാന്‍ കഴിയുന്ന ഒരു സപ്ലൈയറെയോ കണ്ടെത്തണം. നിങ്ങളുടെ ടാര്‍ജറ്റ് ഓഡിയന്‍സിന് അനുസരിച്ചുള്ള ഒരു പാക്കിംഗ് ഉണ്ടാക്കിയെടുക്കണം. മറ്റുള്ള നിയമപരമായ കാര്യങ്ങള്‍ ശരിയാക്കിയെടുക്കണം (സെയില്‍സ് ടാക്‌സ് പോലെയുള്ളവ). ഇത്തരം കാര്യങ്ങളെക്കുറിച്ചുള്ള വ്യക്തമായ വിവരണമാണ് ബിസിനസ് പ്ലാനിന്റെ ഈ ഭാഗത്ത് ആവശ്യം.

ഈ ബിസിനസ് നടക്കുമോ?

ഈ ബിസിനസ് പ്രാവര്‍ത്തികമാണെന്ന് ഉറപ്പുവരുത്തുന്നത് ഓപ്പറേഷന്‍സ് ആന്‍ഡ് മാനേജ്‌മെന്റ് പ്ലാന്‍ കൂടി ആകുമ്പോഴാണ്. ഇത്തരമൊരു ബിസിനസ് നടത്താന്‍ എത്ര സ്റ്റാഫ്, ഏതൊക്കെ തസ്തികകളില്‍ വേണം എന്ന് തീരുമാനിക്കണം. വ്യക്തമായ ഒരു ഓര്‍ഗനൈസേഷന്‍ സ്ട്രക്ചറും, ഓരോരുത്തരും ചെയ്യേണ്ട ഉത്തരവാദിത്തങ്ങളും കൂടെ ഉള്‍പ്പെടുത്തുന്നത് നന്നായിരിക്കും. ഉണ്ടാക്കുന്ന ഉല്‍പ്പന്നങ്ങളുടെ വിതരണം, അതിന്റെ കോര്‍ഡിനേഷന്‍, സ്‌റ്റോക്ക്, ഡാമേജ് പോളിസി എന്നിങ്ങനെ സ്‌റ്റോക്കിംഗിലും വിതരണത്തിലും വരാവുന്ന എല്ലാ മേഖലകളെക്കുറിച്ചും ബിസിനസ് പ്ലാനില്‍ പരാമര്‍ശം വേണം. അത്തരത്തില്‍, പര്‍ച്ചേസ് മുതല്‍ സെയില്‍സ് ചെയ്ത് എക്കൗണ്ടിലേക്ക് പണമെത്തുന്നത് വരെയുള്ള എല്ലാ കാര്യങ്ങളും ഒന്നൊന്നായി വിവരിക്കുന്ന ഒന്നായിരിക്കണം ഓപ്പറേഷന്‍ പ്ലാന്‍. പലരും ഇതിനൊന്നും ഒരു ഗൗരവവും കൊടുക്കാറില്ല. എല്ലാം താനേ നടന്നോളും എന്ന തെറ്റായ മനോഭാവമാണിതിന് കാരണം. പല കാര്യങ്ങളും അങ്ങനെ നടന്നുപോയേക്കാമെങ്കിലും അതിന് നിങ്ങള്‍ കൊടുക്കുന്ന വില കനത്തതായിരിക്കും. അതിനാല്‍ വ്യക്തമായ ഓപ്പറേഷന്‍സ് പ്ലാന്‍ ആയതിനുശേഷം മാത്രം അടുത്ത ഘട്ടത്തിലേക്ക് കടക്കുക.

മണി മാറ്റേഴ്‌സ്

ഇനിയാണ് ഏറ്റവും പ്രധാന ഭാഗം. എത്ര പണം വിനിയോഗിക്കണമെന്നും അതില്‍ നിന്ന് എത്ര വരുമാനം ഉണ്ടാകുമെന്നും എല്ലാ ചെലവുകളും കഴിച്ചുള്ള ലാഭവിഹിതം എന്താകുമെന്നും കണക്കാക്കേണ്ടതുണ്ട്. നിങ്ങളുടെ മാര്‍ക്കറ്റിംഗ് പ്ലാനും, ഓപ്പറേഷന്‍ പ്ലാനും കൃത്യമാണെങ്കില്‍ ഫിനാന്‍ഷ്യല്‍ പ്ലാനും ഏതാണ്ട് കൃത്യമായി തന്നെ വികസിപ്പിച്ചെടുക്കാം. പലരും അടുത്ത 5 വര്‍ഷത്തേക്കുള്ള വരുമാന വിനിയോഗ കണക്കുകള്‍ വികസിപ്പിച്ചെടുക്കാറുണ്ട്. എന്നാല്‍ അടുത്ത 2 വര്‍ഷത്തേക്ക് കണക്കാക്കുന്നതാണ് കൂടുതല്‍ അഭികാമ്യം. കറിപൗഡറുകള്‍ ഒരു ഉദാഹരണമായി എടുത്താല്‍, അതിന്റെ കോസ്റ്റിങ്ങ് മുതല്‍ കണക്കുകൂട്ടലുകള്‍ 
വേണ്ടിവരും. (ഉല്‍പ്പന്നം ഉണ്ടാക്കിയെടുക്കാനുള്ള ചെലവ്). 

ഒരു ജില്ലയില്‍ മാത്രമാണ് കറിപൗഡര്‍ കച്ചവടം ചെയ്യാന്‍ ഉദ്ദേശിക്കുന്നതെങ്കില്‍, ആ ജില്ലയെ പല ഏരിയകളായി തിരിച്ച് വിപണി പ്രവചിക്കാന്‍ നമുക്ക് കഴിയണം. ഉദാഹരണത്തിന് ജില്ലയില്‍ 70 പഞ്ചായത്തുകള്‍ ഉണ്ടെന്ന് കരുതുക. ഒരു പഞ്ചായത്തില്‍ കറിപൗഡര്‍ വില്‍ക്കുന്ന 30 കടകള്‍ ഉണ്ടെന്നും സങ്കല്‍ പ്പിക്കുക (യഥാര്‍ത്ഥത്തില്‍ 30ല്‍ കൂടുതല്‍ കാണും) അങ്ങനെയെങ്കില്‍ ജില്ലയില്‍ 70x30 = 2100 കടകള്‍ നിങ്ങള്‍ക്ക് കറിപൗഡ ര്‍ വില്‍ക്കാനായുണ്ട്. ഈ 2100 കടകളിലും ദിവസം 1 പായ്ക്കറ്റ് വീതം വില്‍ക്കാനായാല്‍ ഒരു ദിവസം 2100 പായ്ക്കറ്റ്. ഒരു മാസം 2100x25 = 52500 പായ്ക്കറ്റ്. ഒരു പായ്ക്കറ്റില്‍ എല്ലാം കഴിഞ്ഞ് 2 രൂപ ലാഭമുണ്ടെങ്കില്‍ മൊത്തം ലാഭം ഒരു ലക്ഷത്തില്‍ കൂടുതല്‍. ഇത് ഒരൊറ്റ ഐറ്റത്തില്‍ നിന്ന് മാത്രം! ഇതുപോലെ 10 ഐറ്റമുണ്ടെങ്കിലോ? ഫിനാന്‍ഷ്യല്‍ പ്ലാനിംഗ് കൊള്ളാം അല്ലേ?!!

പലരും കുടുങ്ങിപ്പോകുന്നതും സംഖ്യകളുടെ ഈ മോഹിപ്പിക്കുന്ന കണക്കിലാണ.് 2100 കടകളില്‍ ഉല്‍പ്പന്നം എങ്ങനെ എത്തിക്കുമെന്നും ആര് എത്തിക്കുമെന്നും, എത്തിച്ചാല്‍ തന്നെ ആളുകള്‍ അത് വാങ്ങിക്കുമോ എന്നും പലരും ഉറപ്പുവരുത്താറില്ല. പക്ഷെ, വ്യക്തമായ മാര്‍ക്കറ്റിംഗ് പ്ലാനും ഓപ്പറേഷന്‍ പ്ലാനും ഉണ്ടെങ്കില്‍ ഈ കണക്കുകള്‍ യാഥാര്‍ത്ഥ്യമാകും. ഒന്നുമാത്രം ഉറപ്പുവരുത്തുക. ബാങ്ക് ലോണെടുക്കാന്‍ നിങ്ങള്‍ എങ്ങനെ വേണമെങ്കിലും പ്ലാന്‍ ഉണ്ടാക്കിയെടുത്തോളൂ. പക്ഷെ ബിസിനസ് വിജയിക്കാന്‍ ശരിയായ, ദിശാബോധമുള്ള ബിസിനസ് പ്ലാന്‍ തന്നെ വികസിപ്പിച്ചെടുക്കുക.

ആദ്യം സ്വന്തമായി ചെയ്തുനോക്കുക. ആവശ്യമെന്നു തോന്നുന്നെങ്കില്‍ പ്രൊഫഷണലുകളുടെ സഹായം തേടുക. വിജയം കൂടെയുണ്ടാകും. തീര്‍ച്ച!!

Thursday, October 30, 2014

How can we help you to improve your business?

Hello everyone..!

Its been with great pleasure we enter UAE, a home away home for all malayalees, a great business hub and a global dream destination!We will be here(at Dubai and Abu Dhabi) from November 3rd to November 19th to meet you and discuss the business matters. As Bramma's chief consultant, i will be available for management trainings for you and your staff. You can call in the above numbers and fix an appointment. We guarantee you to help you!

About us

Bramma Learning Solutions has been consulting small and medium level businessmen for the past 6 years. We have helped more than 200 clients to grow and attain success. Businessmen around the globe may face different issues at different stages of their businesses. It may be the availability of funds, the feasibility and the manpower requirement initially. Marketing strategies, sales team setting, distribution channels may be the next. Sometimes after attaining enough sales, you may find that your organisation is not structured or systemised properly. You may require proper training and development.Your management style may need a professional change. Whatever it be, we assist you in achieving it. We don't just stick on to statistics or reports, but implementing the effective strategies and getting the business.

Our Services
Vision setting, Market survey, Feasibility studies, Business plans, Organisation restructuring, Responsibility definition, Systemisation, HR process management, Accounting and finance streamlining, Sales and marketing strategy development, Training and development, Management style management and mentoring.

I am sure that we can have an effective session! Let's meet in Dubai..